Ова за „Гласот на Америка“ на македонски јазик го велат од американскиот Стејт департмент како одговор на прашањето дали измените на Кривичниот законик со кои се намалуваат казните за злоупотреба на функцијата и за злосторничко здружување ќе ги отежнат напорите на САД да помогнат во борбата против корупцијата во земјава
Лидерите на Северна Македонија да покажат силни, опипливи, антикорупциски резултати преку зајакнување на институционална независност и спречување на политичкото мешање. Ова е дел од изјавата на американскиот Стејт департмент дадена како одговор на прашање на „Гласот на Америка“ на македонски јазик дали измените на Кривичниот законик со кои се намалуваат казните за злоупотреба на функцијата и за злосторничко здружување ќе ги отежнат напорите на САД да помогнат во борбата против корупцијата во земјава.
Ставот на САД, изнесен преку изјавата на Стејт департментот е дека корупцијата има потенцијал да ги поткопа стратегиските амбиции на Северна Македонија.
Во тој контекст, оттаму велат:
„Ја охрабруваме Северна Македонија да ги исполни нејзините ветувања за борба против корупцијата. Лидерите на Северна Македонија мора да покажат силни, опипливи, антикорупциски резултати преку зајакнување на институционалната независност и спречување на политичкото мешање, особено во судството, што е од суштинско значење за исполнување на целите за пристапување во ЕУ и градење доверба на граѓаните во владата“
Соединетите Американски Држави велат дека остануваат посветени да ги повикаат на одговорност оние што се вклучени во значителна корупција и дека ќе продолжат да ги користат сите достапни алатки за борба против корупцијата на глобално ниво.
„Борбата против корупцијата во Западен Балкан е главен приоритет на администрацијата на (американскиот претседател) Бајден. САД ќе продолжат да ги поддржуваат владите, партнерите од граѓанското општество, независните медиуми и граѓаните во борбата против организираниот криминал, искоренувањето на корупцијата, зголемувањето на транспарентноста, спроведувањето на одговорноста и дополнително зајакнување на владеењето на правото и демократските институции“,
се вели во изјавата од Стејт департментот за „Гласот на Америка“ на македонски јазик.
Измените на Кривичниот законик, кои Владата „тајно“ ги утврди, а Собранието експресно ги донесе по скратена постапка (со европско знаменце), а претседателот Стево Пендаровски ги потпиша, од завчера се објавени во „Службен весник“ со датум 7 септември 2023.
Измените се однесуваат на 38 члена од Кривичниот законик, за кои власта рече дека 35 се за усогласување со директивите на ЕУ.
Она што предизвика бура негативни реакции во јавноста е што измените опфатија промена на членовите кои се однесуваа на злоупотреба на службената положба и овластувања (член 353) и злосторничкото здружување (член 394).
Со изгласувањето, пратениците ги намалија пропишаните казни за двете кривични дела, воведоа горна граница на максималната казна, а и укинаа еден став од членот за злоупотреба на службената положба и овластувања. Со тоа предвидоа и порано застарување на делата.
Измените на Кривичниот законик, како што е предвидено, ќе стапат на сила на осмиот ден од објавувањето во „Службен весник“. За повеќето членови е наведено дека ќе почнат да се применуваат шест месеци по стапувањето на сила, но тоа не се однесува и на измените на делата за злоупотреба на службената положба и овластувања што значи дека тие ќе почнат да важат веќе за една недела отсега.
Експресните измени на Кривичниот законик предизвикаа жестоки реакции во јавноста. Вчера и претседателката на Уставниот суд, Добрила Кацарска, изјави дека е фрапирана од тоа како се однесени измени, за кои таа лично не знаела.
Премиерот Димитар Ковачевски, одговарајќи на новинарски прашања вчера, рече: „Ако го прочитате Законот, тогаш ќе видите дека нема никакво помилување и никаква амнестија за никого, туку, напротив, има конкретизација на кривичните дела што некој ги направил“.