Пред неколку дена актуелни и поранешни функционери од ДУИ до медиумите лиферуваа реакција со незадоволство за состојбите во партијата за кои како одговорен го посочија првиот вицепремиер Артан Груби, меѓутоа, што се однесува до владината коалиција, премиерот уверува дека таа е стабилна
Лидерот на СДСМ и премиер Димитар Ковачевски не стравува дека владејачкото мнозинство во Собранието би можело да се загуби поради фракции во ДУИ, партијата која е најголемиот коалициски партнер на социјалдемократите. Коалицијата, вели тој, е стабилна.
„Нема опасност од губење на мнозинството во парламентот“,
рече денеска Ковачевски одговарајќи на новинарски прашања.
Изјавата на премиерот доаѓа откако пред неколку дена актуелни и поранешни функционери од ДУИ до медиумите лиферуваа реакција со незадоволство за состојбите во партијата за кои како одговорен го посочија првиот вицепремиер Артан Груби.
„Арогантното и дилетантско однесување на извршната власт на чело со Артан Груби предизвика незадоволство, револт и пасивност на структурите и на гласачите“,
пишуваше во дел од реакцијата.
Истакнатите членови на ДУИ наведоа дека во партијата не се формираат статутарните партиски органи, политичкото одлучување станало индивидуално и немало никаква дебата и консултација со базата. Оттука, побараа од лидерот Али Ахмети да ја заврши војната односно да го зачува единството, да се отвори внатрепартиската дебата за да се надминат состојбите, но и да се даде отчет од функционерите во извршната власт.
Меѓу потписниците, како што е познато, се петмина актуелни функционери: двајца пратеници – Изет Меџити и Мерита Колчи Коџаџику; заменик-министерот за одбрана Башким Хасани; и градоначалниците на Чаир и на Сарај, Висар Ганиу и Блерим Беџети. Од поранешните функционери, пак, меѓу оние што ставија потпис се и ексвицепремиерот Муса Џафери, како и бившиот градоначалник на Гостивар, Невзет Бејта.
За писмото потоа се огласи и Ахмети велејќи дека партијата има воспоставено стабилни структури со силна база, кои можат да функционираат дури и без него.
„Реков дека ДУИ има поставено стабилни структури кои можат да функционираат без Али Ахмети, без Блерим Беџети, без Муса Џафери, без Изет Меџити, ова е национална инвестиција и оваа национална инвестиција има силна основа и силна поддршка“,
рече Ахмети.
Во јавноста во меѓувреме излегоа и информации дека за да се смири незадоволството во ДУИ била понудена оставка на министерот за надворешни работи, Бујар Османи, кој пак, тоа го нарече глупост и лажна вест.
На прашањето дали има раскол во ДУИ, тој вчера рече дека се работи за партија со голема внатрешна демократија, но на крајот сепак последниот збор го има лидерот Али Ахмети.
„Во ДУИ има голема внатрешна демократија и секој има право да каже свој став, а последниот збор го има Ахмети. Тој вчера го кажа својот став и тука завршуваат сите дебати во ДУИ и си продолжуваат сите со своите ангажмани. Јас не би можел ништо да додадам повеќе“,
рече Османи.