Од Министерството потсетуваат на претходна напомена од ресорниот министер Кренар Лога дека ова работно тело не учествувало во измените на Кривичниот законик што Собранието ги донесе на 6 септември, а кои сè уште ја брануваат јавноста. Изготвувањето на новиот Кривичен законик, се наведува во соопштението на Министерството, е целосно инклузивно и транспарентно и поради тоа потребно е да продолжи со цел спроведување на целосни реформи во казненото законодавство
Групата граѓански организации за реформи во правосудството Блупринт денеска на прес-конференција соопшти дека се повлекува од процесот за изработка на новиот Кривичен законик. Како клучна причина за нивното повлекување од процесот се последните измени на Кривичниот законик од 6 септември 2023 година, кои беа предложени од страна на Владата
Министерството за правда смета дека Блупринт-групата за реформи во правосудството не треба да избрзува со предвремено излегување од работната група за изготвување на новиот Кривичен законик.
Од Правда, во писменото соопштение, велат дека работната група за изготвување на новиот Кривичен законик е самостојна во своето работење и досега за ниту една одредба не е вршено влијание кај претседателот или членовите.
Оттаму потсетуваат на претходна напомена од ресорниот министер Кренар Лога дека ова работно тело не учествувало во измените на Кривичниот законик што Собранието ги донесе на 6 септември, а кои сè уште ја брануваат јавноста, бидејќи поради намалените казни за одредени кривични дела голем дел од предметите против функционери може да застарат.
„Во однос на ставот на Блупринт, сметаме дека не треба да се избрзува со постапките за предвремено излегување од работната група од причина што, како што беше напоменато, од страна на министерот за правда, Кренар Лога, работната група што го изготвува новиот Кривичен законик не учествувала во тие измени што се донесоа од страна на Собранието. Придонесот од граѓанскиот сектор е многу важен поради знаењето кое го има, долгогодишното искуство и вештините со кои располагаат“,
велат од Министерството за правда.
Изготвувањето на новиот Кривичен законик, се наведува во соопштението на Министерството, е целосно инклузивно и транспарентно и поради тоа потребно е да продолжи со цел спроведување на целосни реформи во казненото законодавство.
„Оваа обврска произлегува и од билатералниот Скрининг со ЕУ за донесување на комплетно нов КЗ усогласен со меѓународните стандарди“,
додаваат од Правда.
Групата граѓански организации за реформи во правосудството Блупринт денеска на прес-конференција соопшти дека се повлекува од процесот за изработка на новиот Кривичен законик, со оглед на „целосната состојба каде што се дава легитимитет на нелегитимното“.
„Блупринт-групата нема да учествува во процеси во кои правото и правниот систем се извртуваат и злоупотребуваат, личниот интерес на поединци – го надминува јавниот интерес и општественото добро, а политички цели и интереси – се издигнуваат над темелните вредности“,
порачаа од Блуприн-групата.
Александра Цветановска од Македонското здружение на млади правници на прес-конференцијата изјави дека клучната причина за нивното повлекување од процесот се последните измени на Кривичниот законик од 6 септември 2023 година, кои беа предложени од страна на Владата.
„Постапката во која беа донесени и содржината на овие измени во делот на трите клучни дела за борба против корупција се целосно спротивни на владеењето на правото. Измените во трите спорни кривични дела беа донесени со заобиколување на работната група која работи на нов Кривичен законик, без нејзино консултирање, без соодветно консултирање на стручната јавност, како и без претходно анализирање и проценување на потребата од истото“,
рече Цветановска.
На новинарско прашање дали може нешто да се смени во однос на Кривичниот законик, Ивана Петковска од Коалицијата „Сите за правично судење“ рече дека со измените кои се веќе донесени и стапени на сила, последиците ќе ги трпат и граѓаните и владеењето на правото.
„Враќање назад од таа ситуација нема, односно застарувањето на предметите каде што се опфатени со овој Кривичен законик, дополнително со новиот Кривичен законик додадени се измени во поглед на тоа да се додаде повторно враќање на кривичното дело за јавни набавки, меѓутоа тоа ќе биде закон којшто ќе биде во иднина. Во овој момент за актуелните процеси ќе се применува овој закон, односно овие измени“,
рече Петковска.