Потпишувањето на официјалната нота со која се Полска бара отштета од Германија се случи пред претстојниот состанок на шефот на полската дипломатија Збигњев Рау со германската министерка за надворешни работи Аналена Бербок во Варшава
Полскиот министер за надворешни работи Збигњев Рау денеска потпиша официјална нота со која бара Германија да ѝ плати отштета од 1,3 билиони долари на земјата за штетите предизвикани од нацистите за време на окупацијата во Втората светска војна.
Рау рече дека нотата ќе биде доставена до германското Министерство за надворешни работи и оцени дека таа го задржува неговиот став оти двете страни треба без одлагање да преземат чекори во однос на ефектите од германската окупација на Полска од 1939 до 1945 година на „траен, сеопфатен, правно-обврзувачки и материјален начин“.
Според него, тоа не се однесува само на германските репарации, туку и на решавањето на проблемот со ограбените уметнички дела, архивите и банкарските депозити, а Берлин треба да се потруди да го запознае германското општество со „вистинската“ слика на војната во нејзината катастрофална ефекти врз Полска.
Потпишувањето на официјалната нота се случи пред претстојниот состанок на Рау со германската министерка за надворешни работи Аналена Бербок во Варшава.
На 83-годишнината од инвазијата на нацистичка Германија во 1939 година, проследена со петгодишна окупација, на 1 септември годинава полската влада презентираше сеопфатен извештај за штетата, проценувајќи ја на 1,3 билиони долари, а тоа го прогласи за основа на идното барање за обештетување од Германија.
Наспроти барањата на Полска, Германија тврди оти земјата се откажала од натамошни репарации уште во 1953 година, а дека истото го има потврдено неколкупати.