Во извештајот на полската парламентарна комисија, чии што заклучоци денеска ги соопшти лидерот на владејачката партија „Право и правда” Јарослав Качински се наведува дека Полска претрпела штети во износ од над 1,3 трилиони долари за време на Втората светска војна, што се очекува да биде основа на идното барање за обештетување од Германија
Полска претрпела штети во износ од над 1,3 трилиони долари за време на Втората светска војна, што се очекува да биде основа на идното барање за обештетување од Германија.
Ова се наведува во извештајот на полската парламентарна комисија, чии што заклучоци денеска ги соопшти лидерот на владејачката партија „Право и правда” Јарослав Качински кој уште претходно најави дека Полска ќе бара репарации за сè што направиле Германците во земјата помеѓу 1939 и 1945 година.
EPA-EFE/MATEUSZ MAREK POLAND OUT
Откако ја презеде власта во Полска во 2015 година, „Право и правда“ бара воени репарации, независно што Варшава досега формално не објавила такви барања за Германија. Германија, пак, постојано тврди дека прашањето за воените репарации е решено.
„Подготвени сме не само со извештајот, туку и со одлуката за нашите следни чекори. Ќе пристапиме кон Германија за отпочнување преговори за репарации. Знаеме дека ќе биде долг и тежок пат, но еден ден ќе постигнеме успех“,
рече Качински при презентацијата на документот.
Извештајот беше претставен од Качински и премиерот на земјата Матеуш Моравјецки за време на церемонијата во Кралската палата во Варшава, обновена по завршувањето на војната. На денешен ден Полска ја одбележува годишнината од инвазијата на нацистичка Германија во 1939 година, проследена со петгодишна брутална окупација.
Повеќе од шест милиони Пољаци, вклучително и три милиони полски Евреи, ги загубија животите во Втората светска војна, а главниот град Варшава беше срамнет со земја по бунтот во 1944 година во кој загинаа 200 илјади цивили. Во 1953 година, полските комунистички лидери се откажаа од финансиските побарувања од Германија под притисок на СССР, кој сакаше да ја ослободи Источна Германија од репарации.
Германската Влада и Министерството за надворешни работи допрва треба да се произнесат по полскиот извештај.