Откако не се одржа на закажаниот термин на 6 септември, судењето за пожарот во модуларната болница во Тетово и денеска беше одложено. Овој пат причината за одложувањето на рочиштето е поради тоа што двајца од обвинетите – Бобан Вучески и Артан Етени немаа обезбедено адвокати кои ќе ги бранат во процесот
Почетокот на судењето за пожарот во тетовската модуларна болница, кој се случи пред една година и во кој животите ги загубија 14 луѓе, денеска се одложи по вторпат откако претходно не се одржа во закажаниот термин на 6 септември.
Овој пат причината за одложувањето на рочиштето е поради тоа што двајца од обвинетите – Бобан Вучески и Артан Етени немаа обезбедено адвокати кои ќе ги бранат во процесот.
Поради тоа, судијата Јордан Велковски го одложи судењето за 8 ноември во 10 часот.
Од обвинетите на првото рочиште присутен беше тогашниот директор на Клиничка болница Тетово, Фљорин Бесими, додека отсутни беа економскиот директор Артан Етеми и докторот Бобан Вучевски – обвинетите кои на денешното рочиште немаа обезбедено адвокати.
До судење дојде откако на 27 јули Обвинителството поднесе обвинителен предмет од Основен суд Тетово.
Со тој предлог ОЈО Тетово ги обвини двајцата директори на Клиничка болница Тетово, Фљорин Бесими и Артан Етеми за кривично дело тешки дела против општата сигурност и докторот Бобан Вучевски за кривично дело непостапување според здравствени прописи за време на епидемија, додека правното лице ЈЗУ Клиничка болница Тетово за кривични дела предизвикување на општа опасност и непостапување според здравствени прописи за време на епидемија.
Десет месеци се водеше истрагата од Обвинителството во која стручни анализи и вештачења беа направени од МВР, Технолошкиот факултет, електроинженер, експерти и истражители од сојузната криминалистичка полиција на Германија.
По вештачењето на МВР во октомври минатата година, Обвинителството информира дека пожарот во модуларната болница настанал како последица на запален продолжен кабел, на кој биле приклучен апарат за реанимација, полнач за мобилен телефон и уште еден уред.
Тогашните двајца директори на тетовската болница поднесоа оставки, но останаа на функциите сè до преструктуирањето на Владата.