Претседателот Стево Пендаровски, вчера, во интервју за „360 степени“ рече дека германските експерти всушност ќе ја мониторираат работата на нашите органи, бидејќи според законот странски експерти не можат да започнат истражни или предистражни дејствија
Денеска пристигнаа експертските тимови од Германија коишто треба да спроведат стручна експертиза за причините за пожарот на модуларната болница во Тетово, објави Алсат.
Доаѓањето на експертите од Федералната криминалистика на Германија беше најавено и од страна на Владата.
Станува збор за експертски тим кој доаѓа од Германија, поточно од Бундескриминаламт или Федералната криминалистичка полиција, чиј делокруг на работа е токму во национална и меѓународна соработка, истраги, истражувања и развој. БКА е со висока експертиза во поддршката при истраги, особено во делот на форензички науки, ДНК анализи, електронски истраги и идентификација.
Тимот експерти ќе соработува со МВР и ќе ја помага истрагата која ја води ОЈО.
Претседателот Стево Пендаровски, вчера, во интервју за „360 степени“ рече дека германските експерти всушност ќе ја мониторираат работата на нашите органи, бидејќи според законот странски експерти не можат да започнат истражни или предистражни дејствија.
„Странските експерти доаѓаат како еден вид на неформален стручен консултант. Според моите сознанија такви експерти првпат дојдоа и тоа баш од Германија за атентатот на претседателот Киро Глигоров. Но, нашите граѓаните треба да знаат дека истрагата ќе покаже онолку колку што нашите домашни органи ќе истражат, ќе сакаат да истражат, ќе бидат стручни или ќе им се дозволи да истражат…Но, добро е да има странски експерти за да нема сомнеж дека може нешто да се прикрие, бидејќи странските експерти се тука објективно, во статус на мониторинг, тие набљудуваат. И ова треба да го знаат нашите граѓаните. Ниту еден странски експерт нема право да презема самостојно истражни или предистражни дејствија, може само да присуствува“,
вели Пендаровски.