Според министерот за економија и труд Бесар Дурмиши, најголемите разлики во пресметките се забележуваат кај храната и пијалаците, облеката и обувките, образованието, домувањето и комуналните трошоци. Во категориите за одржување на домаќинството, рекреација и култура, пак, пресметката на Министерството е повисока
Просечната потрошувачка кошница за четиричлено домаќинство во септември изнесувала 58 117 денари, што е за 358 денари помалку во однос на август, но за 1 736 денари повеќе споредено со јануари, информира министерот за економија и труд Бесар Дурмиши по денешната седница на Економско-социјалниот совет (ЕСС).
Пресметката на Министерството, како што вели, има цел да обезбеди транспарентна и статистички заснована слика за трошоците на домаќинствата.
Според него, септемвриската кошница е намалена за 0,6 отсто во однос на август, но е зголемена за 3,1 отсто во споредба со јануари.
„За септември 2026 година, просечната потрошувачка кошница на Министерството изнесува 58 117 денари за четиричлено семејство. Таа е намалена за 358 денари, односно за 0,6 отсто во однос на август. Во споредба со јануари, таа е зголемана за 1 736 денари, односно 3,1 отсто. Внимателно ги следиме и краткорочните движења и притисокот врз семејните буџети“,
рече министерот.
Пресметката опфаќа 11 категории и 101 прехранбен производ, а се користат податоци од Државниот завод за статистика за осум градови, од 23 пазари за овошје и зеленчук, како и цени од пет големи и три регионални трговски синџири.
Според Дурмиши, најголемите разлики во пресметките се забележуваат кај храната и пијалаците, облеката и обувките, образованието, домувањето и комуналните трошоци. Во категориите за одржување на домаќинството, рекреација и култура, пак, пресметката на Министерството е повисока.
Министерот информира и дека досегашните редовни контроли на Пазарниот инспекторат не покажале зголемување на трговските маржи. Тој рече дека контролите се спроведуваат на секои три месеци и дека доколку се утврдат злоупотреби или прекршувања на законите, се изрекуваат казни.
Додаде и дека инфлацијата изнесува 2,7 отсто, а доколку дојде до енормно поскапување на дизелот, Владата повторно ќе интервенира преку акцизите и даноците.
На седницата не се разговарало за минималната плата, но министерот најави дека по Нова година, со поддршка од Европската Унија во рамките на Реформската агенда, ќе започне изработката на минимална потрошувачка кошница, како и посебни кошници за студенти, пензионери и различни типови домаќинства.
Во однос на можните измени за неработните денови, работата во недела и плаќањето по работен час, Дурмиши рече дека не биле доставени конкретни предлози и оти треба да се зачуваат стекнатите работнички права.
Претседателот на Конфедерацијата на синдикалните организации на Македонија (КСОМ), Марјан Ристески, изјави дека синдикатите се против барањата на работодавачите за скратување на празниците. Очекува работодавачите да достават конкретен предлог, кој би можел да се разгледува на следната седница на ЕСС.
Ристески ги повика работниците синдикално да се организираат и во компаниите да се потпишуваат колективни договори. Во врска со потрошувачката кошница, тој нагласи дека во неа треба да биде вклучен и трошокот за кирија, посочувајќи дека високите цени на станбениот простор особено ги погодуваат младите.
Според него, остануваат отворени и прашањата за Законот за работните односи, временските вработувања и, како што рече, злоупотребите со откази пред истекот на договорите со цел да се избегне исплатата на регресот за годишен одмор (К-15).