Еуросупер БС-95 ќе чини 91 денар, а еуросупер БС-98 ќе се продава за 93 денари. Цената на дизелот останува 99 денари за литар
Малопродажните цени на бензините еуросупер БС-95 и еуросупер БС-98 се намалуваат за пет денари за литар. Со тоа, литар еуросупер БС-95 ќе чини 91 денар, а еуросупер БС-98 ќе се продава за 93 денари.
Цената на дизелот не се менува и останува 99 денари за литар.
Според денешната одлука на Регулаторната комисија за енергетика (РКЕ), се намалуваат малопродажните цени на нафтените деривати во просек за 1,89 отсто.
Екстра лесното масло за домаќинство поевтинува за 0,50 денари за литар, со што новата цена ќе изнесува 110 денари.
Од друга страна, мазутот поскапува за 0,694 денари за килограм и ќе се продава по цена од 54,273 денари за килограм.
Од Регулаторната комисија информираат дека при формирањето на цените се земени предвид движењата на референтните цени на нафтените деривати на светскиот пазар, курсот на доларот и измените во акцизите и данокот на додадена вредност.
Во пресметката на цените е применета владината одлука за намалување на ДДВ за дизелот на 10 отсто, како и намалување на акцизата за четири денари за литар кај бензините еуросупер БС-95 и БС-98 и кај дизелот.