Според министерката, основната цел на оваа одлука е да се ублажат ценовните притисоци врз малопродажните цени на нафтените деривати и директно да се намали финансискиот товар врз домаќинствата и бизнис-секторот
Владата ја продолжи мерката за намалување на данокот на додадена вредност (ДДВ) за дизелот од 18 на 10 проценти, како и мерката за намалување на акцизата за горивата, кои ќе важат до 2 ноември годинава, информира министерката за финансии Гордана Димитриеска-Кочоска преку својот профил на Фејсбук.
Според министерката, основната цел на оваа одлука е да се ублажат ценовните притисоци врз малопродажните цени на нафтените деривати и директно да се намали финансискиот товар врз домаќинствата и бизнис-секторот.
„Продолжуваме внимателно да ги следиме состојбите на меѓународните пазари и да преземаме навремени мерки за заштита на животниот стандард и зачувување на економската стабилност“,
истакна Димитриеска-Кочоска.
Денеска, пак, нафтената компанија „Окта“ преку соопштение информира дека воведува привремен попуст од два денари по литар за дизел-горивото. Попустот, велат од „Окта“, ќе важи заклучно со 2 ноември, а се воведува како одговор на најновите случувања на меѓународните пазари на горива.
Според најновата одлука на Регулаторната комисија за енергетика (РКЕ), од денеска дизелот се продава за 99 денари по литар, литар еуросупер БС-95 чини 96 денари, а еуросупер БС-98 ќе се продава за 98 денари по литар.
Дека мерката ќе биде продолжена вчера најави премиерот Христијан Мицкоски кој рече дека таа треба да помогне во амортизирањето на цените на овој вид гориво.
Вчера Собранието на пленарна седница со 70 гласа „за“ и без „против“ и „воздржани“, ја донесе одлуката за продолжување на кризната состојба за нафта и нафтени деривати до 20 април 2027 година.