Експертите ќе соработуваат со МВР и ќе помагаат во истрагата што ја води обвинителството
Тим од експертски од германската Федерална криминалистичка полиција (БКА) доаѓаат во земјава за да помогнат во утврдувањето на причините за пожарот во модуларниот ковид-центар во болницата во Тетово, информираат од Владата.
Утрово е потврдена поддршката од НАТО-сојузникот Германија, со што се одобрува во земјава да пристигнат стручни лица со највисок степен на експертиза во истраги при несреќи, велат од Владата. Станува збор за експертски тим од Бундескриминаламт или Федералната криминалистичка полиција, чиј делокруг на работа, како што се соопштува, е токму во национална и меѓународна соработка, истраги, истражувања и развој.
Експертите ќе соработуваат со МВР и ќе ја помагаат истрагата што ја води обвинителството.
„БКА е со висока експертиза во поддршката при истраги, особено во делот на форензички науки, ДНК-анализи, електронски истраги и идентификација. Во специјалните задачи што ги работи БКА е и тим за истраги при катастрофи и несреќи. Станува збор за институција која во Германија има 60-годишна традиција на дејствување, со околу 7 000 вработени“,
информираат од владиниот кабинет.