Во модуларната болница имало ПП-апарати, но истрагата ќе покаже што точно се случило и зошто за толку кратко време изгорел целиот објект, вели д-р Нуредини
Тој беше запрашан и зошто се дозволувало да има посети во ковид-центарот, на што рече дека таму имало хоспитализирани роднини на вработени и дополнително ќе се утврди кој и зошто бил внатре
Пожарот во ковид-центарот во Тетово ја пеплоса модуларната болница за три минути. Јас веднаш отидов таму кога ми јавија, но веќе сѐ беше завршено, вели координаторот на ковид-центарот, д-р Гзим Нуредини.
Тој на денешната прес-конференција во Тетово рече дека пациентите се спасувале и сами, со кршење прозорци, но за жал живи останале само 12 луѓе, додека 14 се мртви. Тој рече дека тие 12. што успеале да се спасат се префрлени на интерното одделение во тетовската општа болница и се во добра здравствена состојба, односно немаат последици и сериозни повреди од пожарот.
„Сето тоа траеше од три до пет минути. Медицинските екипи, вработените и лица коишто беа надвор, роднини коишто сакаат да комуницираат со нас… сите тие помогнаа и, замислете, сѐ се случи за само три минути. За тоа време се спасија само овие 12 пациенти. Другите не се успеаја бидејќи пламенот за кратко време го зафати целиот простор“,
рече Нуредини.
Според него, во модуларната болница имало ПП-апарати, но вели дека истрагата ќе покаже што точно се случило и зошто за толку кратко време изгорел целиот објект. Тој додаде дека и снимките од безбедносните камери се веќе предадени во обвинителството.
„Нам ни е чудно како може за само неколку минути да изгори целиот објект. Дури и суво дрво да е нема да изгори за три минути. Но, ние не сме експерти за тоа, затоа баравме јавен обвинител да направи увид. Не сакаме да го политизираме настанот, истрагата нека утврди како се случи и зошто изгоре толку брзо“,
вели Нуредини.
Нуредини беше запрашан и зошто се дозволувало да има посети во ковид-центарот, на што рече дека таму имало хоспитализирани роднини на вработени во болницата и дополнително ќе се утврди кој и зошто бил внатре. Рече дека е побарано да се достават имиња и презимиња од сите што биле присутни бидејќи посетите во ваквите оддели се строго забранети.
„Има ситуации кога во ковид-центарот се хоспитализирани роднини на некои од вработени тука, но дополнително ќе се утврди кој и зошто бил внатре. Секоја посета е казнива. Ние и порано имавме укажувања дека наводно имало посети. Веднаш пративме известувања до сите да не се дозволува посета. Дали имало некој случај, не знам. Овде има и вработени во ковид-клиниката кои доаѓале кај свои блиски, некои им се и роднини. Сега бараме да ни дадат имиња кои биле тие роднини и дали биле вработени во ковид-центарот. Но, сите што влегле биле со маска и ги почитувале протоколите“,
рече Нуредини.
Тој информираше дека бројот на хоспитализирани ковид-пациенти се намалува во тетовската болница, а во последното деноноќие починало едно лице како последица на ковид, кое имало коморбидитети.