Од владата претходно се огласија, исто така преку социјалните мрежи, и порачаа дека Пауновски е разрешен поради непрофесионално однесување, а одлуката за отстранување од функцијата била донесена консензуално и според етичкиот кодекс
Досегашниот директор на Државниот пазарен инспекторат (ДПИ) Стојко Пауновски, кој беше разрешен на денешната владина седница, преку социјалните мрежи изрази жалење што, како што напиша, одбраната на интегритетот и на професионалноста не наишла на разбирање од премиерот Зоран Заев.
Тој им се заблагодари на вработените во ДПИ кои изминатите денови застанаа во негова одбрана и се потпишаа на петицијата против неговото разрешување.
„Огромна благодарност до сите граѓани кои во мојот ’пркос‘ ги согледаа моите искрени намери и желба за силна, стручна и независна Европска институција. Патот на одбрана на интегритетот и професионалноста на институцијата со која раководев, за жал, не наидоа на разбирање од премиерот. При ова обраќање, сакам да упатам посебна благодарност до сите вработени во ДПИ кои во оваа битка застанаа рамо до рамо со мене и докажаа со факти дека сите одлуки ги носевме заедно, без разлика што јас им бев претпоставен. Горд сум на сè што направивме заедно! Ми беше чест да работам за Вас и од срце Ви посакувам подобар директор со кого ќе продолжите таму каде што јас застанав“,
напиша Пауновски на Фејсбук.
Од владата претходно се огласија, исто така преку социјалните мрежи, и порачаа дека Пауновски е разрешен поради непрофесионално однесување, а одлуката за отстранување од функцијата била донесена консензуално на владина седница и според етичкиот кодекс.
Разрешувањето следува откако тој одби да ги прифати 35 рамковно вработени кои беа доделени на ДПИ од Министерството за политички систем и односни меѓу заедниците. За разрешувањето од Владата наскоро треба да се огласат и со официјално соопштение.
Премиерот Заев го најави разрешувањето уште во петокот велејќи дека јавното спротивставување на Пауновски е пркос кој не е дозволен. Тој неговиот став го повтори и вчера и потенцираше дека Пауновски не го почитувал Законот за преземање на административни службеници вработени преку K-5 програмата и не ја променил систематизацијата во ДПИ, како и дека неговото однесување е спротивно на етичкиот кодекс.
Заев утрово имаше и средба со инспекторите од ДПИ кои се кренаа во одбрана на Пауновски и собираа потписи, но нивните аргументи не ја предомислија владата.