Во отворената порака до Османи, објавена на својата фејсбук-страница, од „ОМО Илинден Пирин“ велат дека никој не крие кој стои зад отворањето на клубот во Благоевград
Срамота е шефот на македонската дипломатија да проверува што граѓани на друга земја прават во својата земја и што граѓани на трета земја финансираат, реагира „ОМО Илинден Пирин“ на изјавата на министерот за надворешни работи Бујар Османи во врска со отворањето на македонскиот клуб „Никола Вапцаров“ во Благоевград и изедначувањето на овој клуб со клубовите што ги отворија македонските Бугари во земјава.
Во отворената порака до Османи, објавена на својата фејсбук-страница, од „ОМО Илинден Пирин“ велат дека никој не крие кој стои зад отворањето на клубот во Благоевград.
„Тоа е на прво место Друштвото за заштита на основни човекови права во Благоевград, друштво кое повеќепати ја истакнува својата поддршка за евроинтеграцијата на Македонија и за добрососедството меѓу Македонија и Бугарија. Финансиери на клубот се двајца истакнати припадници на македонската заедница во Торонто, Канада: Глигор Цанев и Минчо Остас, а посредник е Македонско меѓународно движење за човекови права“,
посочуваат од „ОМО Илинден Пирин“.
Оттаму додаваат дека Османи всушност не се интересира ниту за тоа кој го отвора клубот ниту кој го финансира, туку се фиксирал само врз некои искажувања на посредникот искажувани во врска со други настани.
„Можеби затоа што си барате изговор зашто нема да дојдете?! Правдање, зашто министерот за надворешни работи на Македонија не ги поддржува Македонците во Бугарија? Така е кога првиот македонски дипломат се информира од жолти сајтови кои шират прикриено бугарска пропаганда во Македонија“,
стои во отворената порака.
Културните активности на Македонците во Бугарија не се провокација, додаваат оттаму.
„Оставете ние, Македонците во Бугарија, да решаваме од што имаме потреба и што ни оди во наш интерес. Вие така или инаку се имате откажано од нас! Оние што не се откажаа од нас – доаѓаат в недела. Тие се добредојдени!“,
пишува во објавата на Фејсбук.
Министерот за надворешни работи Бујар Османи денеска на брифинг со новинарите рече дека нема да оди на отворањето на македонскиот културен клуб во Благоевград од истите причини поради кои не отишол и на отворањето на клубот „Ванчо Михајлов“ во Битола.
„Отворањето на клубот овде не е во интерес на бугарската заедница кај нас, а исто и организацијата која стои зад клубот ‘Никола Вапцаров’ не може да биде во интерес на заедницата таму. Тој процес треба да се врати во духот на добрососедството, а не во духот на натпревар“,
рече Османи.
Според него, отворањето на клубовите не е во функција на добрососедството меѓу двете земји.
Како што објави вчера „360 степени“, клубот „Никола Вапцаров“ во Благоевград го финансира и антиамериканска и анти-ЕУ организација на Македонци од дијаспората.