Како што може да се прочита во поканата за отворањето на клубот „Никола Вапцаров“, тој е основан со финансиска помош на „нашите пријатели од Канада: Глигор Цанев и Минчо Остас од Торонто и Македонско меѓународно здружение за човекови права во Канада“. Информацијата за финансиерите на клубот за „360 степени“ ја потврдија и организаторите на отворањето на клубот
Македонското меѓународно движење за човекови права (ММДЧП) со седиште во Торонто, Канада, го води Бил Николов, канадски државјанин со македонско потекло. На 8 септември, на пример, тој има напишано: „Да бев лидер на Македонија, пред Генералното Собрание на ОН би го соопштил следното `Го вративме вистинското име, Македонија, ги ослободивме сите политички затвореници, се повлековме од НАТО и од кандидатурата за ЕУ и ги протеравме претставници на САД/НАТО/ЕУ од Македонија“
Отворањето на македонскиот културен клуб „Никола Вапцаров“ во Благоевград, Бугарија кое е закажано за 30 октомври е финансирано од Глигор Цанев и Минчо Остас од Торонто и Македонското меѓународно движење за човекови права (ММДЧП).
Ова може да се прочита на фејсбук-профилот на ОМО Илинден Пирин, во поканата за отворањето на клубот, каде покрај останатите формалности, се наведени и „пријателите“ со чија финансиска помош се реализира иницијативата.
Информацијата за финансиерите на клубот за „360 степени“ ја потврдија и организаторите на отворањето на клубот.
За двајцата финансиери Цанев и Остас, кои се јавуваат како физички лица, нема јавно достапни податоци за нивните биографии, професии и ангажмани.
Од друга страна, пак, за Македонското меѓународно движење за човекови права (Macedonian Human Rights Movement International) има многу повеќе информации, а здружението има и своја интернет-страница, од која барем, според најголем дел од текстовите, вестите и ставовите објавени на неа, може да се заклучи дека станува збор за организација со изразена антиамериканска, анти-ЕУ и анти-НАТО ориентација.
Токму на нивната веб-страницата во објава од 2 октомври здружението информира дека е „горд финансиер“ на отворањето на македонскиот клуб „Никола Вапцаров“ закажано за в недела, 30 октомври.
„Македонското меѓународно движење за човекови права со гордост објавува дека го финансиравме отворањето на Македонскиот културен центар Никола Вапцаров во Горна Џумаја (преименуван во „Благоевград“ од Бугарија), Пиринска Македонија. Официјалната церемонија ќе се одржи на 30 октомври 2022 година“,
пишува во објавата.
Во неа се додава дека културниот центар ќе биде управуван од Македонското друштво за заштита на основните човекови права, „организација која се залага за угнетеното македонско малцинство во Бугарија, а ќе продолжи да се финансира од Македонското меѓународно движење за човекови права“.
Веќе во наредниот пасус од текстот, јасно паѓа в очи антагонизмот на ММЧДП кон актуелната Влада во земјава и нејзиниот премиер, Димитар Ковачевски.
Организацијата со седиште во Торонто, Канада, чиј претседател е Бил Николов, актуелната власт во С Македонија ја именува како „режим“ и ја обвинува дека не си го одржала зборот дека ќе го „финансира македонскиот културен центар во Пиринска Македонија“ и продолжила да им помага на Бугарија и Грција во потиснувањето на идентитетот и човековите права на македонците низ Балканот.
„Димитар Ковачевски, премиерот на режимот во Република Македонија, вети дека ќе го финансира македонскиот културен центар во Пиринска Македонија по осудата на режимот за отворањето на бугарскиот клуб за глорификација на нацистите во Битола, Република Македонија, именуван по Ванчо Михајлов, озлогласениот бугарски нацистички соработник и воен злосторник. Клубот беше отворен по налог на бугарската влада – и на Европската Унија – во нивните континуирани напори да ги смират јавно прославените цели на Бугарија за искоренување на етничкиот идентитет на Македонците, културата, историјата и постоењето на големото македонско малцинство во Бугарија, така што Бугарија го укина ветото за кандидатурата за членство на Република Македонија во ЕУ. Како што се очекуваше, режимот одби да го исполни нивниот „завет“ и избра да продолжи да им помага на Бугарија и Грција да ги потиснат идентитетот и човековите права на Македонците низ Балканот“,
велат од ММДЧП.
На крајот од веста на интернет-страницата следи повик до организациите за човекови права, медиумите, новинарите, политичките партии и сите вистински заинтересирани за заштита на човековите права, „да ја осудат системската злоупотреба на правата на Македонците и да присуствуваат на церемонијата на 30 октомври, како набљудувачи и поддржувачи“.
Осуда за меѓународната политика на САД и латентен проруски сентимент
Инаку, за прифилот на Македонското меѓународно движење за човекови права и за нивниот не само антизападен вокабулар, туку и активности, сведочат бројни објави и коментари за локални настани – повразни со земјава, но и за светски збиднувања. Во нив преовладува згрозеност од меѓународната политика на САД, НАТО и Европската унија, која според организацијата се рефлектира и на актуелните случувања и настани во С Македонија повразни со нејзината евроатлантска интеграција.
„Американскиот начин е да ги осудува злоупотребите, се додека не се извршени од самите нив или некој што ја има нивната поддршка; САД истовремено осудуваат и поттикнуваат војна, воспоставуваат и укинуваат независност, декларираат почит кон и истовремено го крашат меѓународното право. И Западот бесрамно ги има извршено сите овие дела во Македонија; Денес Македонија го слави Денот на независноста, но од првиот ден Западот се здружи со нашите угнетувачи да се погрижат Македонија никогаш да не стане вистински независна, ни ги контролираат политичарите, со сила ни го сменија името, знамето, идентитетот, но ние ќе победиме; Да бев лидер на Македонија, пред генералното собрание на ОН би го соопштил следното `Го вративме вистинското име, Македонија, ги ослободивме сите политички затвореници, се повлековме од НАТО и од кандидатурата за ЕУ и ги протеравме претставници на САД/НАТО/ЕУ од Македонија; Не Џо (Бајден н.з.) не е тајна дека САД и ти како претседател замислувате свет заснован на послушност кон САД и сосема е соодветно што пишувачот на говори на Бајден ги ставил зборовите автократија и САД во иста реченица“,
се само дел од ставовите на ММДЧП објавени на социјалните, кои во во најголем дел се на профилот на нејзиниот претседател Бил Николов, дел од профилот на организацијата под логото „Нашето име е Македонија (Our name is Macedonia).
И додека во активностите на организацијата преовладуваат ставови контра САД, ЕУ и НАТО, од друга страна во дел од нив е присутен прорускиот сентимент.
„Поенатата на НАТО е….? Наместо да ја ограничува руската агресија – што очигледно не може и не сака – како би било да ја превенира (наместо да ја охрабрува) американската агресија?; На ЦП 24: `Оркестрирано гласање се одржува во окупираните региони на Украина за креирање подлога за нивна анексија од Москва“, „ЦП 24 ако верувате дека ова е случај, зошто тогаш не ги повикате САД затоа што го прават (го измислија) истото на светско ниво“,
пишуваат од ММДЧП.
Како што е најавено, в недела на 30 октомври во Благоевград треба да биде отворен македонскиот културен клуб „Никола Вапцаров“.
Отворањето на клубот го следеше извесна драматика, откако, според информациите Советот на Општина Благоевград прво донесе декларација со која се забранува неговото отворање за потоа градоначалник на општината да се премисли и сепак да дозволи в недела со свечена церемонија да се реализира оваа иницијативата.
Сепак, денеска Бугарската национална телевизија (БНТ) пренесе дека наследниците на Никола Вапцаров не се согласуваат македонскиот клуб во Благоевград, кој треба да се отвори на 30 октомври, да го носи неговото име.
„Тврдењата што ги имаат браќата од Северна Македонија не се оправдани бидејќи сите документи што ги имаме и нашата самосвест и чувство дека ние неговите роднини – јас како внук, сестра ми како внука и татко ми како брат, секогаш сме тврделе дека сме Бугари бидејќи сме родени од мајка Бугарка и татко Бугарин. А, во прашалникот на Вапцаров јасно пишуваше дека е од бугарско потекло и со бугарска националност“,
вели Никола Вапцаров, внук на познатиот поет.
На отворањето што треба да се случи во недела, нема да присуствува премиерот Димитар Ковачевски, како ниту претставници на бугарската влада иако добиле покани. Присуство најави лидерот на ВМРО-ДПМНЕ, Христијан Мицкоски и партијата Левица.
Инаку, премиерот Димитар Ковачевски пред неколку дена, одговарајќи на новинарски прашања дали ќе оди на отворањето на клубот „Никола Вапцаров“, кратко одговори дека тој ден ќе биде во Скопје.
Ковачевски дополнително информираше дека во Министерството за култура и во Владата се подготвува документација за отворање македонски културен центар во Благоевград, а барањето, како што најави, ќе биде испратено до бугарската влада.
„Верувам дека отворањето културни центри меѓу државите е начин на кој се зближуваат како држави, како институции и како граѓани“,
додаде Ковачевски.