Од Јавното обвинителство велат дека синоќа издале барање за обезбедување на потребните податоци – видеозаписи од надзорни камери за настанот на улицата „Боемска“ во Скопје
Неофицијално, од ресторанот во кој бил лидерот на ВМРО-ДПМНЕ тврделе дека носачите на снимките се украдени, но откако МВР обезбедило судска наредба за претрес, уредите со снимките биле пронајдени и обезбедени
Полицајците од СВР Скопје и од Единицата за брзо распоредување (ЕБР) дури во раните утрински часови ја напуштија „Боемска“ во Скопје. Иако уште пред стемнување беа пред ресторанот кој не дозволил инспекција од Пазарниот инспекторат, на органите на редот им требаа седум часа за да си заминат со она што го бараа – снимките од надзорните камери.
Зошто толку драма?
Причината што целиот настан на „Боемска“ доби публицитет не е тоа што инспекторите на Државниот пазарен инспекторат биле спречени во контролата на еден ресторан на улицата, туку што внатре во објектот имало гости. И тоа не кои било гости, туку лидерот на најголемата опозициска партија ВМРО-ДПМНЕ, Христијан Мицкоски, во време кога е забрането да се примаат муштерии внатре во објектите заради заштита од ковид-19.
Во одреден момент Мицкоски заминува од ресторанот на „Боемска“, но драмата само се зголемува. Пред ресторанот стигнуваат две полициски единици. Прво, Единицата за брзо распоредување (ЕБР), наводно по наредба од директорот на БЈБ, Сашо Тасевски, кој е кадар на СДСМ. Задоцнува СВР Скопје, каде што шеф е Ристо Ставревски, кадар на министерот Наќе Чулев од ВМРО-ДПМНЕ. И едните и другите се таму за една работа – да ги обезбедат снимките од камерите во ресторанот. Но, без налог од јавен обвинител ниту едните ниту другите не можат да го сторат тоа.
ОЈО: Побаравме да се обезбедат снимките
Од Јавното обвинителство за „360 степени“ велат дека им стигнал допис за настанот во доцните вечерни часови. Како испраќач на документот го наведуваат СВР Скопје.
„Со писменото известување беше побарано од Обвинителството да издаде барање за обезбедување на потребните податоци – видеозаписи од надзорни камери за да се обезбедат докази за извршено кривично дело. По приемот на писменото известување, дежурниот јавен обвинител издаде барање за доставување податоци до угостителскиот објект, а тоа барање треба да го извршат овластени службени лица од СВР Скопје кои го поднесоа писменото известување“,
велат од ЈО на РСМ.
Зошто се чекало толку, институциите засега немаат официјален став. Дури во раните утрински часови полицајците успеале да ги земат уредите на кои се бележат снимките од безбедносните камери. Но, од Обвинителството велат дека за евентуална нечија кривична одговорност ќе чекаат пријава од МВР.
„По обезбедување на сите докази кои се однесуваат на наведениот настан, и тоа: записниците од Државниот пазарен инспекторат, видеозаписите и други потребни докази, по евентуално поднесување кривична пријава, Обвинителството ќе постапи согласно Законот за кривична постапка“,
велат од ЈО на РСМ.
Обид да се скријат снимките?
Официјално и дополнителната заменик-министерка за внатрешни работи Славјанка Петровска потврди дека носачите со снимките се обезбедени. „360 степени“ побара став и информации и од министерот Наќе Чулев, но од него засега немаме одговор.
Додека челните луѓе се резервирани, неофицијално дознаваме дека откако полицијата од Обвинителството го добила барањето за обезбедување на потребните податоци – видеозаписи од надзорни камери, од ресторанот рекле дека такво нешто немаат, зашто носачите за снимките им се украдени.
Поради сомнеж дека не е така, од МВР побарале и добиле наредба за претрес на објектот од судија на претходна постапка. По извршениот претрес, носачите на снимките биле пронајдени и подигнати заради понатамошно постапување.