Генералниот директор на АД ЕСМ, Васко Ковачевски, на денешната прес-конференција порача дека ЕСМ во моментов прави пресметки за потребната количина енергија што ќе биде потребна за 518 нови субјекти кои од 1 декември ќе се снабдуваат со електрична енергија по поевтина цена
Вкупно 233 основни и средни јавни училишта, 50 јавни претпријатија од областа на водостопанството и 235 прехранбени субјекти аплицирале за владината мерка, според која, „ЕСМ продажба“ ќе ги снабдува со поевтина струја од 1 декември, соопштија на денешната прес-конференција премиерот Димитар Ковачевски, министерот за економија Крешник Бектеши и генералниот директор на АД ЕСМ, Васко Ковачевски.
„За оние што ја искористија таа можност и се пријавија АД ЕСМ преку ‘ЕСМ продажба’ од 1 декември ќе почне со снабдување на трите категории на потрошувачи опфатени со одлуката на Владата за субвенционирана струја. Субјектите што не успеале да поднесат комплетни документи до вчера, во следниот период ќе можат да го сторат тоа и ќе бидат ставени на субвенционирано снабдување од 1 јануари идната година“,
рече премиерот Димитар Ковачевски на денешната прес-конференција во Владата.
Согласно владината одлука се пријавиле вкупно 235 субјекти кои вршат производство на основните прехранбени производи како масло за јадење, леб, брашно,млечни и месни производи да се снабдуваат со струја по цена од 80 евра по мегават-час. Оваа мерка, според очекувањата на Владата, треба да ги стабилизира и намали цените на крајните прехранбени продукти.
Со цел непречено одвивање на наставата во земјава, за снабдување со струја по поевтина цена аплицирале 474 основни и средни училишта во државата. Според мерката, од 1 декември тие ќе плаќаат субвенционирана струја по цена од 95 евра по мегават-час.
Во категоријата јавни комунални претпријатија, се пријавиле 50 субјекти чија дејност е од областа на водостопанство, собирање и одведување на урбани отпадни води и прочистување на отпадни води кои работат со пумпни или пречистителни станици. Цената по која тие ќе ја плаќаат струјата од ЕСМ продажба е 95 евра по мегават-час.
Министерот за економија Крешник Бектеши на денешната прес-конференција рече дека при креирањето на мерките и носењето на одлуки за субвенционирано снабдување со електрична енергија се зема предвид просечната потрошувачка од претходните години.
Одговарајќи на новинарско прашање дали мерката за субвенционирана струја за компаниите од прехранбената индустрија ќе биде алиби оти компаниите кои не ја користат мерката ќе ги зголемуваат цените на прехранбените производи, министерот за економија Крешник Бектеши кажа дека за тие компании ќе има други мерки.
„Не, за нив ќе има други мерки кои ќе се донесат во случај ако не ги намалат цените. Постои Закон за трговија, можеме да донесеме мерки во време на криза со предлог на Министерство за економија за замрзнување на цените или ограничување на маржите и слично. Државниот пазарен инспекторат ќе врши соодветни контроли. Сите тие треба да ги намалат цените на производите кои се утврдени во одлуката со трговска маржа. Во случај ако тоа не се случи, ќе видите какви мерки ќе се носат“,
изјави министерот Бектеши.
Генералниот директор на АД ЕСМ, Васко Ковачевски, на денешната прес-конференција порача дека ЕСМ во моментов прави пресметки за потребната количина енергија која ќе биде потребна за 518 нови субјекти што од 1 декември ќе се снабдуваат со електрична енергија по поевтина цена.
„Точните пресметки ќе ги имаме пред 1 декември кога ќе почне испораката на електрична енергија. Имаме план за производство и план за набавки, особено за периодот октомври, ноември и декември. Предвидени се набавки на електрична енергија и во ноември, но и во декември со цел 100-процентно да се покрие испораката на електрична енергија кон домаќинствата и малите потрошувачи, односно да имаме сигурна и стабилна испорака и да нема рестрикции“,
рече генералниот директор на ЕСМ, Васко Ковачевски, во одговор на прашање на денешната прес-конференција во Владата.