Овие мерки се за граѓаните, овие мерки не се за некој во време на криза да ужива во раскош, а некој да не може да врзе крај со крај. Затоа да си понесат одговорност за комунални претпријатија за снабдување со вода, за основни и средни училишта за да се обезбеди сè она што им е потребно на граѓаните. Во време на криза не се финансираат раскош и изобилие, туку се финансира солидарност, рече премиерот
Министерот додаде дека од Град Скопје освен за „Водовод“ барале државата да ги покрива трошоците и за Јавното сообраќајно претпријатие „Скопје“
Премиерот Димитар Ковачевски и министерот за економија Крешник Бектеши на денешната прес-конференција ги искараа општините затоа што навреме не ги пријавиле училиштата и комуналните претпријатија за мерките за субвенционирање на трошоците за електрична енергија, поради што централната власт мора директно преку одлука да ги преземе надлежностите на локалните власти.
Дополнително, како што посочи Бектеши, дел од општините барале трошоците за струја на административните згради и другите трошоци да им ги покрива Владата.
„Ако ги гледате бројките, не сите основни и средни училишта се пријавени, а за жал не се пријавени ниту сите јавни комунални претпријатија, што значи дека излегува оти во време на криза државата треба со одлука директно да ги преземе надлежностите на општините, што е за жално и тоа мора да го кажам. До вчера и во Електрани на Северна Македонија (ЕСМ) и во Министерство за економија се јавиле одредени општини за да ги стават и административните згради и другите трошоци што ги имаат да им ги покрие централната власт преку ‘ЕСМ продажба’. Јас сакам да ја искористам оваа пригода и да ги повикам градоначалниците од градовите да ги следат сите можности што ги дава Владата и навремено да се пријавуваат, затоа што на крајот на денот тоа ќе значи поголеми цени на нивните услуги од 1 јануари наредната година, а ние овие мерки ги носиме во интерес на граѓаните и потрошувачите“,
рече Бектеши.
Министерот додаде дека од Град Скопје освен за „Водовод“ барале државата да ги покрива трошоците и за Јавното сообраќајно претпријатие „Скопје“.
„Само во Град Скопје освен `Водовод` и ЈСП сака да се покрива од страна на државата. Ние сме кажале, овој буџет е буџет на граѓаните и буџетот на граѓаните ќе се троши, за граѓаните на нашата држава да не плаќаат поголеми сметки, а не некому што не може да направи ниту апликација во рок од две недели Владата да ги презема нивните надлежности, да им завршиме ние работа“,
порача Бектеши.
На повикот на Бектеши се надоврза и премиерот Ковачевски, кој истакна дека мерките за субвенционирање на трошоците за струја на компаниите што произведуваат основни прехранбени производи, за училиштата, болниците и водосанабдителните компании, а не, за како што рече, нечии раскош и изобилство.
„Она што го кажа министерот за економија е исклучително важно… Сакам да упатам порака до општините, овие мерки не се раскош ниту на државна администрација ниту на општинската администрација. Овие мерки не се за некој да седи по канцеларии да си вари кафиња, да си држи состаноци и да си чита весници. Овие мерки се за граѓаните, овие мерки не се за некој во време на криза да ужива во раскош, а некој да не може да врзе крај со крај. Затоа да си понесат одговорност за комунални претпријатија за снабдување со вода, за основни и средни училишта за да се обезбеди се она што е потребно за граѓаните. Во време на криза не се финансираат раскош и изобилие, туку се финансира солидарност“,
нагласи Ковачевски.