Националната канцеларија за поврат и заштита на средства на Унгарија соопшти дека открила големи количини готовина закопани во шума, скриени во земјоделски објекти, магацини и станбен имот, како и во скап сеф на скриена локација
Во фокус на истрагата е Миклош Шештак, министер за национален развој на Унгарија од 2014 до 2018 година, кој е осомничен за примање мито и провизии во износ од над 37,2 милиони долари, поврзани со набавки на возила за државната автобуска компанија
Унгарските власти соопштија дека заплениле готовина во вредност од 19,5 милиони долари, дел од нив закопани во шума и скриени на други места, во рамки на истрага против поранешен министер во владата на Виктор Орбан.
Во фокус на истрагата е Миклош Шештак, министер за национален развој на Унгарија во периодот од 2014 до 2018 година, кој е осомничен за примање мито и провизии во износ од над 37,2 милиони долари, поврзани со набавки на возила за државната автобуска компанија, како и со државни градежни проекти.
Националната канцеларија за поврат и заштита на средства на Унгарија соопшти дека во дводневната акција во Будимпешта и три унгарски оркузи открила големи количини готовина закопани во шума, скриени во земјоделски објекти, магацини и станбен имот, како и во скап сеф на скриена локација. Канцеларијата, која неодамна беше формирана од новата унгарска влада, на социјалните мрежи објави и видео од акцијата, на кое се прикажани пронајдените пари, како и истражителите кои со лопати копаат во земја, најверојатно во шума, во текот на ноќта.
„Вкупниот износ на готовина пронајдена за време на дводневниот претрес изнесуваше 5 071 632 000 форинти, 2 658 350 евра и 1 257 100 американски долари“,
соопшти Националната канцеларија за поврат и заштита на средства на Унгарија.
Запленетите средства се префрлени во државната каса на Унгарија.
Унгарскиот премиер Петер Маѓар оцени дека со акцијата почнува крајот на, како што кажа, мафијата на Фидес.
„Ова официјално го означува крајот на мафијата на „Фидес. Од денес е докажано дека Виктор Орбан е мафијашки бос – паднат мафијашки бос. А Фидес е криминална организација“,
напиша Маѓар на социјалните мрежи.