Информацијата за најновите, петти по ред закани за поставени бомби во скопски средни училишта ја потврдија од Министерството за внатрешни работи од каде што велат дека пријавата во СВР Скопје за заканите стигнала околу 14 часот, а станува збор за училиштата „Орце Николов“, „Никола Карев“, „Здравко Цветковски“ и „Јосип Броз Тито“.
Попладнево учениците и професорите од четири скопски средни училиште биле евакуирани откако на нивните електронски адреси попладнево пристигнале закани за поставени експлозивни направи.
Информацијата за најновите, петти по ред закани за поставени бомби во скопски средни училишта ја потврдија од Министерството за внатрешни работи од каде што велат дека пријавата во СВР Скопје за заканите стигнала околу 14 часот. Оттаму не наведуваат за кои училишта станува збор.
„Во СВР Скопје околу 14 часот е пријавено дека на мејл-адреси на четири училишта во Скопје е упатена закана за поставена бомба. Веднаш по добиената пријава, од полициски службеници се преземени мерки за безбедно евакуирање на училиштата. Во тек се антитерористички проверки и се преземаат мерки за расчистување на случајот“,
информираат за „360 степени“ од МВР.
Од Министерството додаваат дека станува збор за училиштата „Орце Николов“, „Никола Карев“, „Здравко Цветковски“ и „Јосип Броз Тито“.
Дојавите за поставени бомби во средни училишта во Скопје почнаа на 26 октомври и оттогаш речиси секој ден по неколку гимназии во главниот град добиваат вакви закани, кои по антитеристичките проверки на полицијата се покажаа како лажни.
Во средата МВР соопшти дека привела едно лице за кое постојат сомневања дека е поврзано со дојавите и дека во организација со надлежното јавно обвинителство е извршен претрес во неговиот дом и се одземени предмети за вештачење.
Истиот ден во вечерните часови од платформата „Конзерватив.мк“ на Фејсбук соопштија дека станува збор за нивниот член Никола Николовски, за кого посочија дека е неосновано приведен и оти се работи за општествено одговорен граѓанин.
Николовски беше ослободен по неколку часа поминати во полициска станица на информативен разговор.
Министерот за внатрешни работи Оливер Спасовски на 29 октомври информира дека пораките за наводно поставени бомби биле пуштени од странство.
„Пораките се пуштени од надвор од државата. Имаме сериозни индиции за тоа како се одвива целиот тој процес и во тој дел навистина работиме максимално посветено, со помош на нашите партнери, со цел да ги прекинеме овие монструозни чинови кои предизвикуваат вознемиреност кај граѓаните“,
изјави Спасовски.
Министерството за образование и наука (МОН) ги осуди лажните дојави за бомби и упати апел до училишните раководства да го подигнат нивото на безбедност во училиштата и да продолжат со организација на воспитно–образовниот процес.