Од МОН нагласија дека училиштата се и натаму ќе останат средина во која учениците ќе се чувствуваат безбедно и ќе го развиваат својот потенцијал преку непречена и квалитетна настава, а од органите повикаа што побрзо расчистување на случајот
Министерството за образование и наука (МОН) ги осуди лажните дојави за бомби кои деновиве ги добија повеќе средни училишта во главниот град, поради што работата на училиштата беше делумно попречена.
МОН упати апел до училишните раководства да го подигнат нивото на безбедност вo училиштата и да продолжат со организација на воспитно–образовниот процес.
„Локалните самоуправи под чија и надлежност се основните општински и јавните средни училишта, МОН и МВР секогаш излегуваат во пресрет кога е потребна било каква дополнителна поддршка, затоа што сите делуваме во насока на заштита на најдобрите интереси на учениците и воопшто на младите“,
се наведува во соопштението на МОН.
Оттаму нагласија дека училиштата се и натаму ќе останат средина во која учениците ќе се чувствуваат безбедно и ќе го развиваат својот потенцијал преку непречена и квалитетна настава.
„Тоа е суштината на постоењето на образовните установи и МОН го осудува секој обид за попречување и прекин на наставата, одвлекување на вниманието на учениците и наставниците од реализацијата на секојдневните училишни, односно работни обврски и создавање непотребни грижи за нивната сигурност во училниците“,
додаваат од МОН.
Од Министерството изразија уверување дека од соодветите органи ќе бидат пронајдени субјектите кои ја попречија работата на повеќе средни скопски училишта изминативе денови и оти ќе бидат санкционирани час поскоро.
Изминативе денови повеќе средни училишта во главниот град на своите мејл-адреси добија заканувачки пораки дека во нивните објекти има поставено бомби, со што работата во училиштата делумно беше во прекин.
По извршените антитерористички проверки на единици на МВР во училиштата беше утврдено дека сите дојави за бомби се лажни.
Пријавите за дојави за бомби во средните училишта во Скопје почнаа во средата – 26 октомври кога вкупно осум средни училишта во главниот град добиле заканувачки мејлови за поставени експлозиви. Следниот ден, девет училишта ги добиле истите заканувачки пораки на своите мејл-адреси, но и во двата случаи се утврди дека дојавите се лажни.
Вчера, трет ден по ред имаше лажна дојава за поставена бомба, но овојпат само во едно училиште.
Министерот за внатрешни работи Оливер Спасовски во гостување во ТВ Телма во четвртокот кажа дека е познато од каде се испратени мејловите кои деновиве стигнаа на мејл-адресите на дел од средните училишта во главниот град. Тој додаде оти интензивно се работи сè со цел да се дојде со сторителот, односно до испраќачот на лажните дојави за бомби во училиштата.
„Ќе се анализираат причините и ќе дознаеме зошто е тоа така. Дали се политички, дали се геостратешки, можеби и бизнис причини. Во оваа фаза ние практично ги знаеме мејловите. Знаеме од каде се пратени. Ги знаеме точните податоци во оваа насока и на тоа работиме интензивно се со цел да дојдеме до сторителот“,
рече Спасовски.
Нарекувајќи ги во најмала рака монструозни, Спасовски кажа дека дојавите за бомби веројатно се дел од хибридните напади на кои сме изложени како држава.