На средбата присуствувале министерот за земјоделство, директорите на АХВ и на Агенцијата за управување со одземен имот, претставници на МВР и градоначалникот на Крива Паланка, при што била презентирана нацрт-верзија на акциски план за кој засегнатите страни дале свои сугестии и забелешки. Документот сега треба да оди како информација на следната седница на Владата за институциите конечно да почнат да постапуваат на терен

Централната и локалната власт сè уште не дошле до конечно и трајно решение за долгогодишниот проблем со кравите во Крива Паланка и околината, вели градоначалникот на Општина Крива Паланка, Сашко Митовски, за „360 степени“.
По денешниот работен состанок во Министерството за земјоделство, тој изјави дека за решение ќе зборува дури кога ќе почне да се постапува на терен.
„За жал, сè уште не сме дојдени до конечното и трајното решение на проблемот и за мене истото ќе важи сè до оној момент додека немаме конкретно постапување на терен“,
рече Митовски.
На средбата, на која присуствувале министерот за земјоделство, директорите на Агенцијата за храна и ветеринарство (АХВ) и на Агенцијата за управување со одземен имот, како и претставници на МВР, била презентирана нацрт-верзија на акциски план. Засегнатите страни дале свои сугестии и забелешки, а документот треба да оди како информација на следната владина седница.
Според Митовски, планот предвидува координирана акција во која секоја институција ќе постапува во рамките на своите надлежности. Носител на оперативната организација треба да биде АХВ, заловениот добиток потоа би преминал во надлежност на Агенцијата за управување со одземен имот, во акцијата ќе биде вклучено и МВР, додека Општина Крива Паланка и јавните претпријатија ќе обезбедат логистичка поддршка.
Утврдената временска рамка за спроведување на акцијата е не повеќе од десетина дена.
„Јас сум убеден дека можеме за десетина денови, доколку има волја и искрена намера од сите институции, да дојдеме до конечното решение“,
вели градоначалникот.
Од Општината инсистирале во акцискиот план да бидат вметнати конкретна буџетска и временска рамка, бидејќи првично ги немало. Дополнително, побарале согласност од Бирото за јавни набавки за да можат да склучуваат договори и оперативно да ја помогнат акцијата, иако Митовски уште еднаш повтори дека Општината нема законска надлежност сама да врши заловување на крупен добиток.
„Надлежноста е исклучиво во Агенцијата за храна и ветеринарство, а отпосле и во Агенцијата за управување со одземен имот, а мојата волја, волјата на општината и подготвеноста да помогнеме се апсолутно ставени на располагање на сите државни институции“,
додаде тој.
Во однос на обемот на проблемот, Митовски посочи дека последниот официјален податок од вонредниот инспекциски надзор на АХВ е дека станува збор за околу 480 незгрижени грла добиток, но реалната слика на терен е многу посериозна.
„Според информации од локалните жители и она што можеме да го видиме секојдневно низ нашиот град, мислам дека бројката достигнува некаде околу илјада грла добиток. Навистина затоа сметаме дека алармот треба да се вклучи и сите надлежни државни институции да се вклучат во решавањето на овој проблем“,
заклучи Митовски.
