Силниот ветер вечерва предизвика проблеми на повеќе патни правци во државата кои се отстрануваат од дежурните екипи на Јавното претпријатие „Македонија пат“
Управата за хидрометеоролошки работи издаде предупредување за силен ветер вечерва, во текот на ноќта и утре претпладне. Ветерот, кој ќе дува од југозападен правец, повремено ќе надминува брзина од 80 километри на час.

„Во текот на ноќта и утре претпладне ќе има и врнежи од дожд кои ќе бидат пообилни во западните делови, каде се очекува да наврнат и над 15 литри на квадратен метар“,
најавува УХМР.
Силниот ветер вечерва предизвика проблеми на повеќе патни правци во државата. Според информациите на Јавното претпријатие „Македонија пат“, на патниот правец А2 Гостивар – Стража – Кичево кај клучката Гостивар имало паднато семафор и една канделабра. На истиот патен правец на неколку места имало и паднати дрвја. Од претпријатието велат дека сите се навремено отстранети од страна на дежурните екипи.
Паднати дрвја се пријавени и на патниот правец Скопје – Тетово пред Карпалак и на регионалниот патен правец Р1206 Тетово – Скопје, а екипи на „Македонија пат“ работат на нивно отстранување од коловозот.
„Поради овие временски прилики на учесниците во сообраќајот им се препорачува внимателно возење, приспособување на брзината согласно условите на патот и почитување на поставената сообраќајна сигнализација“,
велат од ЈП „Македонија пат“.
