Дополнително, од Министерството информираат дека се завршени и антитерористичките проверки во скопските училишта кои и денеска на своите мејл-адреси добиле закани за поставени бомби. По проверките, утврдено е дека дојавите за поставени бомби во сите девет училишта се лажни
Скопјанец со иницијали Н.Н. денеска е притворен поради сомнение дека е поврзан со заканите за поставени бомби во училишта во Скопје, информираат од Министерството за внатрешни работи (МВР).
„Во координација со надлежното обвинителство се преземаат мерки за расчистување на случајот“,
додаваат оттаму.
Дополнително, од Министерството информираат дека се завршени и антитерористичките проверки во скопските училишта кои и денеска на своите мејл-адреси добиле закани за поставени бомби. По проверките, утврдено е дека дојавите за поставени бомби во сите девет училишта се лажни.
„Најнапред околу 14.30 часот во СВР Скопје беше добиена пријава од шест училишта, потоа околу 15 часот уште од две училишта и потоа од уште едно училиште во Скопје. Веднаш по добиените пријави, од полициски службеници се преземени мерки за безбедно евакуирање на сите девет училишта, а потоа се извршени и детални проверки од тимови за антитерористички проверки и утврдено е дека станува збор за лажни пријави“,
соопштија од Министерството.
МВР информира дека шест училишта во главниот град и денеска на своите мејл-адреси добиле дојави за бомби. По извесно време, дојави за поставени бомби добиле уште три училишта во Скопје.
Минатата недела имаше неколку дојави за бомби во средните училишта во Скопје и за сите се утврди дека биле лажни.
Пријавите за дојави за бомби во средните скопски училишта почнаа на 26 октомври кога вкупно осум училишта во главниот град добиле заканувачки мејлови за поставени експлозиви. Следниот ден, девет училишта ги добиле истите заканувачки пораки на своите мејл-адреси, но и во двата случаи се утврди дека дојавите се лажни. На 28 октомври повторно имаше дојава за бомба, но само во едно училиште. И за таа дојава се утврди оти е лажна.
Министерот за внатрешни работи Оливер Спасовски во меѓувреме информираше дека пораките за наводно поставени бомби биле пуштени од странство.
„Пораките се пуштени од надвор од државата. Имаме сериозни индиции за тоа како се одвива целиот тој процес и во тој дел навистина работиме максимално посветено, со помош на нашите партнери, се со цел да ги прекинеме овие монструозни чинови кои предизвикуваат вознемиреност кај граѓаните“,
кажа Спасовски.
Министерството за образование и наука (МОН) ги осуди лажните дојави за бомби и упати апел до училишните раководства да го подигнат нивото на безбедност вo училиштата и да продолжат со организација на воспитно–образовниот процес.