Од МВР додаваат дека секој граѓанин на Скопје ќе може да пристапи во полициските станици според местото на живеење во кој било период од денот, секој ден од неделата, со цел да си ја подигне готовата лична карта
Министерството за внатрешни работи известува дека започнува со нов начин на достава на личните карти. Од понеделник, 11.3.2024 година, жителите на Скопје ќе можат да ги подигнат новите лични карти во полициските станици според местото на живеење.
„Анализата на успешноста на доставата на лични карти на домашна адреса на граѓаните на територија на град Скопје доведе до заклучок дека таа е нецелосна, несеопфатна и недоволно ефикасна, а истовремено го нема посакуваниот ефект и кај граѓаните и кај полициските службеници кои беа задолжени за достава“,
се наведува во соопштението од МВР.
Од МВР додаваат дека секој граѓанин ќе може да пристапи во кој било период од денот, секој ден од неделата, со цел да си ја подигне готовата лична карта.
Кон крајот на јануари МВР најави дека почнува со достава на новите лични карти и возачки дозволи на домашна адреса кај граѓаните. Полициските службеници требаше да ги доставуваат новите документи, а доколку не ги најдат дома по неколку обиди граѓаните самите требаше да ги подигнат своите лични карти и возачки од полициските станици според местото на живеење. Како што соопштија тогаш од МВР, идејата беше да се олесни и забрза процесот на промена на личните документи.