Дополнително, во соопштението Министерството посочува дека во континуитет работи на подигнување на безбедноста во училиштата на повисоко ниво
Министерството за образование и наука (МОН) денеска преку писмено соопштение апелира до училишните раководства да се придржуваат до својата должност и да најдат начин како до крајот на првото полугодие ќе се надоместат часовите што беа пропуштени поради лажните дојави за бомби кои делумно ја попречија работата во училиштата.
„Наставата во средните училишта во Скопје каде во изминатите денови имаше повремени прекини, мора да продолжи, а училишните раководства кои се најодговорни за квалитетен и безбеден воспитно – образовен процес, согласно позитивните правни прописи, имаат должност да изнајдат начин и до крајот на првото полугодие да ги надоместат пропуштени часови“,
велат од МОН.
Дополнително, во соопштението Министерството посочува дека во континуитет работи на подигнување на безбедноста во училиштата на повисоко ниво.
„Местото на учениците е во училишните клупи и секој прекин на наставата го попречува нивниот правилен развој. Затоа МОН во координација со МВР, локалните самоуправи, раководствата на училиштата и низа партнерски домашни и меѓународни организации континуирано работат на нивна заштита преку подигнување на безбедноста во училишните објекти“,
додаваат од МОН.
Меѓу другото, оттаму ги осудија лажните дојави за поставени бомби во скопските училишта кои вчера шести пат по ред ги добија дел од школите во главниот град и изразија надеж дека испраќачите на заканите ќе бидат пронајдени и санкционирани што поскоро.
Вчера девет скопски училишта добија закани за поставени бомби во своите објекти, но по извршените антитерористички проверки од страна на единиците на МВР се отврди оти се лажни.
Премиерот Димитар Ковачевски вчера нагласи дека лажните дојави за бомби кои вчера по шести пат стигнаа до мејл-адресите на скопските училишта, се дел од стратегија за хибридни напади, на која се изложени и земјите од регионот и пошироко.