Митрески најавил дека уште денеска ќе иницира состаноци со министрите за внатрешни работи, за финансии, за надворешни работи, како и со првиот човек на Агенцијата за супервизија на осигурувањето. Истовремено претседателот на Собранието информирал и дека ќе одржува ад хок состаноци со координаторите на пратеничките група со цел заеднички да најдат решение за настанатата ситуација
Има најави дека пратеничките групи ќе достават различни предлози за законски измени за проблемот со возачките дозволи. Ова денеска го соопштија од кабинетот на претседателот на Собранието Јован Митрески откако вчера попладне Министерството за внатрешни работи информира дека од утре граѓаните нема да можат да ги возат автомобилите на територијата на државата, односно за домашна употреба, ако имаат возачка дозвола со старото име Република Македонија. Потоа, во јавноста имаше бурни реакции од граѓаните, особено на социјалните мрежи.
Од Собранието информираат дека на денешната редовна координација на која присуствуваат координаторите на пратеничките групи било отворено прашањето за проблемот со возачките дозволи, а претседателот Митрески ја нагласил потребата Собранието да преземе итни чекори со цел да се надмине состојбата која произлезе од примената на Преспанскиот договор.
„Пратеничките групи треба да дејствуваат координирано за да се дојде до најбрзото и најдоброто решение, кое ќе биде во интерес на граѓаните, а кое во исто време нема да наштети на почитувањето на меѓународните правни акти кон кои како држава сме се обврзале“,
соопштија денеска од кабинетот на Митрески.
Претседателот на Собранието побарал од координаторите да ги информираат пратениците дека доколку е потребно ќе закаже итна собраниска седница во текот на денешниот ден.
„Митрески најави дека уште денеска ќе иницира состаноци со министрите за внатрешни работи, за финансии, за надворешни работи, како и со првиот човек на Агенцијата за супервизија на осигурувањето. Истовремено, претседателот Митрески информираше дека ќе одржува ад хок состаноци со координаторите на пратеничките група со цел заеднички да најдат решение за настанатата ситуација“,
велат од Собранието.
Во врска со возачките дозволи, ресорното министерство ги известува граѓаните дека од утре ќе важат само возачките дозволи со името Република Северна Македонија.
Од Министерството за внатрешни работи велат дека ќе постапуваат согласно закон и затоа апелираме граѓаните да не управуваат возило доколку немаат валидна возачка дозвола со името Република Северна Македонија.
„Предупредуваме и дека во случај на настаната штета при евентуална сообраќајна несреќа, поради невалидната возачка дозвола, граѓаните кои немаат валидна возачка дозвола ќе мора да ги сносат последиците околу евентуалната штета“,
велат од МВР.
Техничкиот министер Панче Тошковски вели дека уште кога дошол на функцијата најавил дека ќе поднесе закон за изменување и дополнување на Законот на лични документи и на Законот за безбедност во сообраќајот.
Тоа, според него, е единственото решение во оваа ситуација кога граѓаните се заглавени и не можат навреме да ги сменат своите лични документи. Со измените на законите тврди дека ќе се овозможи нормално функционирање.
Измените ги подготвив. Готови се. Тука се. Бев опструиран во овие две недели од мои колеги, односно други министри, кои ми велеа дека ќе сме прекршеле меѓународен договор. Како сум се дрзнал да предлагам вакво нешто. Она што го предлагам е согласно сите меѓународни акти кои гарантираат основни човекови права. Со тоа што ние ќе забраниме излез на македонските граѓани и ќе ги притвориме на територија од 26 илјади квадратни километри ги кршиме Европската конвенција за човекови права, Универзалната декларација за човекови права, го кршиме нашиот Устав, кршиме донесени пресуди од Стразбур. Кршиме основно човеково право. Оваа држава ќе треба да му плати баснословни суми за надомест на штета на секој еден граѓанин кому ќе му оневозможи да излезе од државата, а е со валидна патна исправа од аспект на втиснат датум со старо име“,
рече Тошковски
Од СДСМ денеска најавија дека нивната пратеничка група ќе поднесе предлог-законски измени со кои на возачките дозволи, сообраќајните дозволи, осигурителните полиси и сообраќајните книшки ќе им биде продолжена важноста по 12 февруари.
Со законските измени кои ги предлага СДСМ би се овозможило возачките дозволи да може да се користат за внатрешна употреба и по 12 февруари, а граѓаните да не се казнуваат ако во сообраќај бидат затекнати со возачка дозвола со старото уставно име на државата.
„Ова е соодветно решение, возачките се за домашна употреба и мора да важат и понатаму. За овие законски решенија очекуваме поддршка од сите пратенички групи во македонското Собрание. Наместо да се шири паника меѓу граѓаните и со неодговорно однесување на министрите на ДПМНЕ во техничката Влада да се создава дополнителен хаос, сите политички партии да го поддржат овој предлог“,
велат од СДСМ.
Од ВМРО-ДПМНЕ, пак, денеска обвинија оти хаосот со промена на документите бил создаден додека со Министерството раководел Оливер Спасовски.
Оттаму сметаат дека токму Спасовски свесно го оставил МВР без обрасци за документи пред да замине од позицијата.
Го прозваа ексминистерот за внатрешни работи, потсетувајќи го на изјавата која тој ја даде во август минатата година кога кажа дека нема да има казни за граѓаните кои нема навреме да ги сменат личните документи.
Претседателот на државата Стево Пендаровски доцна синоќа побара од парламентарните политички партии веднаш да донесат измени на Законот за безбедност на сообраќајот на патиштата и соодветните норми во други закони што ја регулираат оваа област за да им се овозможи на граѓаните да им важат возачките дозволи и возачките книшки на сите возачи кои што учествуваат во сообраќајот на територијата на државата, а чиј рок на важење не е истечен сметано од нивното издавање.
„Како што кажав и пред неколку седмици, доколку се има политичка волја, законските решенија може да се донесат во многу краток рок“,
рече тој.