Со законските измени што ги предлага СДСМ би се овозможило возачките дозволи да може да се користат за внатрешна употреба и по 12 февруари, а граѓаните да не се казнуваат ако во сообраќај бидат затекнати со возачка дозвола со старото име на државата
Синоќешното известување од Министерството за внатрешни работи (МВР) оти од денеска на полноќ нема да важат возачките дозволи и пасошите од утринава предизвика меѓусебни обвинувања помеѓу ВМРО-ДПМНЕ и СДСМ за проблемот со личните документи.
Откако преку партиски соопштенија си ја префрлија вината еден на друг околу тоа дека граѓаните ќе се казнуваат ако бидат затекнати како возат со возачка дозвола со старото уставно име, од СДСМ најавија дека нивната пратеничка група ќе поднесе предлог-законски измени со кои на возачките дозволи, сообраќајните дозволи, осигурителните полиси и сообраќајните книшки ќе им биде продолжена важноста по 12 февруари.
Со законските измени кои ги предлага СДСМ би се овозможило возачките дозволи да може да се користат за внатрешна употреба и по 12 февруари, а граѓаните да не се казнуваат ако во сообраќај бидат затекнати со возачка дозвола со старото уставно име на државата.
„Ова е соодветно решение, возачките се за домашна употреба и мора да важат и понатаму. За овие законски решенија очекуваме поддршка од сите пратенички групи во македонското Собрание. Наместо да се шири паника меѓу граѓаните и со неодговорно однесување на министрите на ДПМНЕ во техничката влада да се создава дополнителен хаос, сите политички партии да го поддржат овој предлог“,
велат од СДСМ.
Претходно денеска од ВМРО-ДПМНЕ, чиј кадар дојде на челната позиција во МВР на местото на досегашниот министер од редовите на СДСМ, обвинија оти хаосот со промена на документите бил создаден додека со Министерството раководел Оливер Спасовски. Него го обвинија оти свесно го оставил МВР без обрасци за документи пред да замине од позицијата.
Оттаму дополнително го прозваа ексминистерот Спасовски потсетувајќи го на изјавата која тој ја даде во август минатата година кога кажа дека нема да има казни за граѓаните кои нема навреме да ги сменат личните документи.
„’Спасовски ги смирува граѓаните – нема да има казни за оние кои нема навреме да си ги заменат личните исправи’ – ова беше изјавата пред само шест месеци со која СДС го лажеше народот. Денес тие го создадоа проблемот, а глумат невини жртви и криво им е ВМРО-ДПМНЕ, а тие имаа министер за внатрешни работи девет години. Воедно Спасовски треба кривично да одговара што граѓаните ги изложува на екстра трошок, и иако знаеше дека треба промена на документите ништо не презема за тоа“,
велат од ВМРО-ДПМНЕ во партиското соопштение.