Поранешната претседателка на Советот на ИНИ вели дека Институтот е злоупотребен во овој случај за лиферување политички памфлет, кој не е валиден во процедурална смисла, односно не е став на целата институција
Професори од Институтот за национална историја (ИНИ) се оградуваат од вчерашното соопштение на ИНИ, кое се однесува на последниот развој на настаните меѓу Северна Македонија и Бугарија.
Соопштението, како што велат од ИНИ, било усвоено на вчерашната седница на Советот на Институтот, на која присуствувал и Драган Ѓоргиев, копретседателот на заедничката комисија со Бугарија, како директор на институцијата. Но, тој немал право на глас.
Проф. д-р Марија Пандевска, поранешна претседателка на Советот на ИНИ, вели дека Институтот е злоупотребен во овој случај за лиферување политички памфлет, кој не е валиден во процедурална смисла, односно не е став на целата институција, туку на членовите на Советот, кои не побарале согласност од другите свои колеги пред да го објават.
„Тоа може да биде став на Советот на ИНИ, а не на целиот Институт. Јас како научник, имам право на индивидуален став, посебно поради тоа што цели 35 години работам на балканската историја во 19 и 20 век. Не може некој друг и во мое име да испраќа соопштенија до јавноста. Тоа е придобивка на плурализмот, а во науката унисоно размислување не е возможно“,
вели Пандевска во изјава за „360 степени“.
Таа нагласува дека Институтот е научна, а не политичка институција.
„Јас знам дека, генерално, насекаде политиката ја користи науката. Меѓутоа, кога се влегува во ИНИ, политиката мора да се остави пред вратата. “,
вели професорката.
Пандевска посочува дека никој не ги консултирал научните работници во ИНИ во однос на вакви сложени прашања и состојби во тешки времиња.
„Овој вид комуникација заличува на политички памфлет, кој не содржи соодветна научна аргументација, што може да биде на штета на македонската научна мисла, како и на самата институција, која преку своите објавени научни трудови и целокупната дејност се залага за деполитизација на научната мисла“,
вели дел од научниот кадар на ИНИ.
Во дел од медиумите, вчера беше објавено соопштение од Институтот за национална историја, во кое се осудуваат „сите форми на политичко оспорување на македонската историографија, на македонската национална историја и идентитетот“.
„Институтот не може да не реагира во услови кога политиките директно задираат во науката и особено кога со политички меморандуми цела една нација и историска наука се квалификуваат како фалсификаторство и се повикува на целосна ревизија на историјата на македонскиот народ и нација“,
велат од највисоката македонска институција за историски проучувања, што ја раководи Ѓорѓиев.
Реакцијата на ИНИ доаѓа по интервјуто на премиерот Зоран Заев за БГНЕС, кое предизвика многу реакции во јавноста, а пред очекуваната нова средба на историчарите од мешовитата комисија на Бугарија и Македонија.
Според македонскиот копретседавач со Заедничката комисија, историскиот спор треба да продолжи да се дебатира на академско ниво и може и понатаму да остане нерешен, но тој не треба да влијае на политичките односи меѓу двете земји.
Денеска и Скопскиот државен универзитет – УКИМ се вклучи во дебатата во однос на историјата и македонскиот јазик низ призмата на актуелните односи со Бугарија. Во соопштение до медиумите, во кое, слично како и во примерот со ИНИ, се пренесуваат ставови во име на целата институција, УКИМ изразува поддршка за „стратегиските напори на Владата за интегрирање во ЕУ“.