Обезвреднувањето на идеалите и на жртвите за посебна македонска држава би значело и поткопување на темелите на државата, се наведува во соопштение на најстариот државен универзитет
Универзитетот „Св. Кирил и Методиј“ денеска се вклучи во дебата во однос на историјата и македонскиот јазик низ призмата на актуелните односи со Бугарија.
Од УКИМ истакнуваат дека ги поддржуваат стратегиските напори на Владата на нашата држава за интегрирање во ЕУ и се придржува на Промеморијата на МАНУ за државотворноста и идентитетот на македонскиот народ, при што ги повикува Владата и сите чинители во евроинтеграциските процеси да ги почитуваат достигањата на македонските научни работници од областа на хуманистичките, општествените и културолошките науки, како и сознанијата на светската славистика, лингвистика и современа историска наука.
„Македонскиот јазик и неговите дијалектни разновидности имаат и просторен, и временски континуитет; македонскиот јазик е посебен јазик од групата на јужнословенските јазици, кој се изучува на универзитетски центри во целиот свет; македонскиот идентитет е изграден врз колективното сеќавање и врз свеста за традицијата, културата, етнокултурната, политичката и јазичната засебност на македонскиот народ; процесот на формирање на македонскиот народ и македонската нација во ништо не се разликува од соодветните процеси кај другите балкански народи и нации; формирањето на еден народ не е и не може да биде последица на административен акт; создавањето на македонската држава е заедничка придобивка од долготрајната борба на македонскиот народ и сите други етнички заедници; ова историско тежнеење доживеало кулминација во антифашистичката војна, поради што македонската државност е заснована врз антифашистички начела“,
посочуваат од УКИМ во соопштение што го пренесува МИА.
„Обезвреднувањето на идеалите и на жртвите за посебна македонска држава би значело и поткопување на темелите на државата“,
се вели во соопштението од УКИМ, од каде што сметаат дека нивната реакција е оправдана како продолжувач на традицијата на сесловенските просветители и како најголем и најстар универзитет во македонската држава, во чии организациски единици се истражуваат, се проучуваат, се негуваат и се афирмираат македонскиот јазик, македонската историја и македонското културно и духовно наследство.