Прво шефот на државата, а сега и премиерот, побара благослов од поглаварот на Цариградската патријаршија за автокефалност на МПЦ – Охриска архиепископија
Премиерот Зоран Заев, како што соопштија вечерва од Владата, испратил писмо до патријархот Вартоломеј, поглаварот на Цариградската патријаршија, во кое се навраќа на средбата во Истанбул, на која беше побарана негова асистенција и заложба Македонската православна црква – Охридска архиепископија, да биде признаена како автокефална црква и да биде примена во заедницата на помесните православни цркви.
„Го почитуваме сето она што е одредено од меѓународните договори и состојби. Но, бараме да бидеме слободни и црковно во рамките на границите на нашата земја и нашите архиереи да сослужуваат со архиереите од сите православни цркви во светот“,
се вели во писмото на премиерот Заев до неговата светост, патријархот на Цариградската патријаршија Вартоломеј.
Во писмото се истакнува дека православниот народ во нашата земја заслужува црковна независност, што ја сонува веќе цел еден век и дека очекува да ја види Македонската православна црква – Охридска архиепископија признаена како автокефална, со благословот и со писмена одлука од првиот меѓу Христовите архиереи на земјата, цариградскиот патријарх Вартоломеј.
Во јануари годинава, набрзо откако беше избрана техничката Влада, Заев, заедно со тогашниот премиер Оливер Спасовски, имаше средба со цариградскиот патријарх.
Пред неколку дена, и претседателот Стево Пендаровски упати писмо до Вартоломеј, од кого побара да го искористи своето „апелациско право“, за православните христијани од земјава конечно да бидат еднакви со другите во светот.