Претседателот Стево Пендаровски во писмо до вселенскиот патријарх Вартоломеј побара да го искористи негово „апелационо право“, за православните христијани од земјава конечно да бидат еднакви со останатите во светот.
Писмото тој го испратил по повод почетокот на Новата црковна година.
„Ви се обраќам во името на голем дел од моите сограѓани коишто се идентификуваат како православни христијани и чија единствена желба и потреба е да се смират со своите ближни и да се упатат кон заедничката иднина, кон соживотот и кон вистинската слобода. Во оваа насока би сакал да упатам барање до Вашата Сесветост да го уважи повикот на нашиот благочестив народ и на нашата Црква да го употребите своето апелационо право, со што нашите граѓани од православна христијанска вероисповед, конечно, ќе ја добијат можноста да бидат еднакви со сите останати православни христијани во светот“,
пишува Пендаровски.
Историјата вели, пишува претседателот, дека треба постојано да се сообразуваме со времето и да го користиме во полза на благосостојбата на луѓето, а вселенската патријаршија е пример за тоа како може да се остане доследен на вредностите, а истовремено да се биде динамичен во соочувањето со тековните предизвици.
„Како претседател на мојата земја, сакам лично да Ве информирам дека како држава, изминативе три години, решивме да го искористиме времето во наша полза и да ги оставиме зад нас историските несогласувања“,
наведува Пендаровски.
Тој на крајот од писмото до Вартоломеј, му посакува здравје среде големата неизвесност со здравствената криза.