Веднаш по изборниот ден, редица поранешни високи функционери на партијата почнаа да бараат оставка на Мицкоски, процес кој доби на интензитет од завчера. Сега, актуелни структури во партија го возвраќаат „ударот“
Меѓу другите работи што се случија месецов, на социјалната мрежа Твитер е отворен нов профил под псевдонимот ТвТхеБох. Барем „на прва“ не може да се повлече корелација меѓу името на профилот и трите први твита на корисникот.
Сите се објавени денеска и се однесуваат на еден човек со име и презиме Сашо Мијалков, поранешен висок полициски и партиски функционер. „Случајно“, објавувањето на твитовите доаѓа еден ден откако првиот братучед на претходниот претседател на партијата Никола Груевски побара актуелниот шеф на ВМРО-ДПМНЕ да си поднесе оставка.
Целта на твитовите имаат очигледна намера, да се дискредитираат ставовите на Мијалков. Во нив се прикажани фотографии од стан на Охридското Езеро за кои корисникот тврди дека наводно се сопственост на поранешниот шеф на тајната полиција, а корисникот што ги објавил прашува:
„Кога ја пишуваше Сашо анализата? Додека ги чекаше стаклените ѕидови од Чешка за 170 квадратниот пентхаус со спална што гледа на Охрид или додека рушеше ѕидови на станот што се води на ‘Ексико’?“,
се вели во еден од трите твита.
Овие твитови веројатно ќе останеа незабележани за јавноста бидејќи авторот нема ниту 20 следачи во моментот на пишување на овој текст. Но, затоа, некои медиуми веднаш ги забележале пораките и објавија текстови. Околу еден час по објавата на првите содржини на новиот твитер-профил, порталот „Лидер“, на пример, веќе објави сторија со наслов: „Мијалков купил скап рисорт на Охридско Езеро!“.
Возвратни удари
Сашо Мијалков секако не е без багаж кој на секој противник на политичката сцена му дава гратис „удари“ уште пред да почне мечот. Така, неговата лична дискредитација и покрај неговата порака до Мицкоски не е само на Твитер.
Иако без да споменува имиња, и актерот Тони Михајловски денеска настапи во одбрана на актуелното раководство на партијата. Меѓу редови, јасно е кому му се обраќа кога вели:
„Разочарани милионери и киднапери на фотелји и канцеларии кои веднаш почнаа да плукаат по ‘новите’ и заборавија како ги браневме братски додека ги растргнуваат со бомби. Не се буневме дека тие беа избраните околу лидерот и свитата на Султанот. Избега човекот кој се нудеше да го судат него, а да ја остават партијата. Револтирано членство кое се чувствуваше предадено, напади од комунистичката повраќаница СДС, но и жестоки напади и предавства од внатре и тоа од оние заради чии грешки и глупости не можеше членството и народот во очи да ги погледнете. Стиропорот почна да се појавува на виделина, фекалиите исто така, па сепак… не се предадовме, не се откажавме, не направивме компромис со злото, не излажавме, не убивме и не украдовме,
пишува Тони Михајловски на Фејсбук.
Дека ВМРО-ДПМНЕ го „врти листот“ за односот кон критиките од поранешните функционери покажува и денешната преписка меѓу поранешниот градоначалник на Аеродром Ивица Коневски и актуелниот портпарол на партијата Димче Арсовски.
Коневски утрово побара „промени“ во партијата за експресно да добие подбивлив, па на моменти и навредлив одговор од Арсовски.
Откако Коневски возврати дека што побрзо си замине „Мицкоски и баграта“ тоа подобро за партијата, доби нов експресен одговор од другиот партиски портпарол, дека поседувал стан и деловен простор во спорната зграда која се изгради во зеленилото кај „Мајчин дом“.
Освен Мијалков и Коневски, деновиве свои критички осврти кон актуелното раководство на ВМРО-ДПМНЕ имаа и поранешниот министер за надворешни работи Никола Попоски, пратеничката Даниела Рангелова, градоначалникот на Кавадарци Митко Јанчев и други. Тие сепак не го добија истиот „третман“.
Барем засега е непознато, дали актуелното раководство на ВМРО-ДПМНЕ реши да не ги коментира и останатите или тие реагираа во момент кога стратегијата на партијата била да се молчи. Во кој и да е случај, засега не е јасно клучното прашање – кои од гласовите во хорот критики кон Мицкоски се координирани и кој е претендентот за неговата фотелја.