Поранешниот директор на УБК, кој беше исклучен од ВМРО-ДПМНЕ за време на превирањата околу референдумот и уставните измени, вели дека, сепак, не верува дека која било албанска партија ќе влезе во „авантура“ да коалицира со Мицкоски и со Левица
Сметам дека е чесно да им се каже на членовите дека ова раководство и оваа политика на ВМРО-ДПМНЕ се поразени и дека нема да дојдат на власт, вели Мијалков
Ако Христијан Мицкоски не успее да состави влада, треба си оди од лидерската позиција и да се избере ново раководство на ВМРО-ДПМНЕ, смета поранешниот директор на УБК, Сашо Мијалков, оценувајќи дека ова е најслабиот изборен резултат на партијата од 2002 година досега.
Мијалков, кој своевремено беше мошне влијателен во ВМРО-ДПМНЕ, од каде што беше исклучен за време на превирањата околу Преспанскиот договор, уставните амандмани и референдумот за името во 2018 година, во интервју што го пренесува „Плусинфо“, сепак, забележува дека шансите Мицкоски да направи влада се минимални.
„Според мене, шансите се сведени безмалку на нула, но тоа е последната сламка за спас за која се држи ова раководство. За три години Христијан Мицкоски доживеа три тешки порази. На претседателските избори падна од 535.000 гласа во 2014 година на 319.000 гласа лани. На референдумот немаше став, но знаеме дека победи опцијата на власта и конечно потопот што се случи на 15 јули“,
вели Мијалков.
Тој вели дека се сомнева оти Левица ќе сака да му даде поддршка, со оглед на тоа што во програмските определби на партијата е барањето да се забрани користење на името ВМРО и да се бара повлекување од НАТО и од ЕУ курсот, како и отповикување на признавањето на Косово. Исто така, посочува дека е прашање дали која било партија од албанскиот камп ќе сака да влезе во, како што вели, авантура со Мицкоски.
„Искрено, се сомневам дека која било албанска партија ќе сака да влезе во авантура со Левица и со Мицкоски. Сметам дека е чесно да им се каже на членовите дека ова раководство и оваа политика на ВМРО-ДПМНЕ се поразени и дека нема да дојдат на власт. Сепак, не гледам зошто не би им се оставил уште еден краток временски простор за да се види дали ќе успеат и во најновото ветување дека и покрај поразот ќе успеат да состават влада“,
вели Мијалков.
Доколку не успеат во тоа, како што вели, патот е јасен: признавање на неспособноста, извинување за грешките и ослободување на партијата за демократизација и ново раководство.
„Повторно, преку нивни полтрони, пуштаат нарачани текстови дека сум стоел зад некои кандидати само за да ме нападнат и мене и нив. Јас стојам зад тоа дека демократски треба да се избере ново раководство доколку не успеат да го исполнат и последното ветување. Сигурен сум дека кој било кандидат ќе има поголем капацитет од сегашните, но треба да се избере најдобриот што ќе ја поведе партијата во нови победи. Реалноста гласи дека ова раководство на ВМРО-ДПМНЕ го оствари најслабиот резултат во историјата. Од освоените 455 000 гласа на последните парламентарни избори во 2016 година, Христијан Мицкоски падна на 315 000 гласа. Само Љубчо Георгиевски бил полош од него во 2002 година, кога освои 300.000 гласа, а тогаш и тој и Љубе Бошковски беа на црната листа на САД, a зад себе имаа шверц на цигари, нафта,убиства и куп други афери. Затоа сите искрени и чесни членови и симпатизери на ВМРО-ДПМНЕ се потиштени и разочарани, а само раководството слави победа“,
вели Мијалков.