Говорејќи во врска со можноста Атина да стави вето на евроинтегративниот процес на земјава, шефот на грчката дипломатија рече дека ветото е институционално право на земјите членки на Европската Унија. Во тој контекст, тој повтори дека почитувањето на Договорот од Преспа е предуслов за напредок на С Македонија кон Унијата
Неупотребата на уставното име од страна на новата претседателка на државата Гордана Силјановска-Давкова при давањето на свечената изјава во Собранието и најавите на раководството на ВМРО-ДПМНЕ дека ќе продолжат во идентичен манир по составувањето на новата влада, освен во земјава главна тема е и во Грција.
Шефот на грчката дипломатија Јоргос Герапетритис во интервју за грчката телевизија ЕРТ вели: „Сите сфаќаме дека новото раководство на Северна Македонија може идеолошки да има поразлично мислење, но постојат прашања што се над нивната волја.“
„Не се работи за прашање на самоопределување на функционерите, политичарите, ова сите го сфаќаме, туку се работи за почитување на договореното“,
вели Герапетритис, јави дописничката на МИА од Атина.
Тој го повтори официјалниот став на Атина, искажан вчера и од премиерот на земјата, дека Грција бара целосно усогласување со Договорот од Преспа.
Објаснувајќи го опсегот на Преспанскиот договор и неговата тежина, шефот на грчката дипломатија кажа дека од моментот кога еден меѓународен договор се ратификува од парламентите стекнува моќ повисока од законите и никоја од двете страни не може еднострано да го ревидира.
Дури и некоја од страните да не се согласува со она што е вклучено во договорот,, тој мора да се спроведува, додава Герапетритис.
„Името Република Северна Македонија во Договорот од Преспа, согласно член 20, не може под никоја околност да се измени. Прашањето за името не е од оние прашања што може да се изменат, дури ни со заемна согласност. Па така, никаде не се покренува прашање за измена. Онака како што е договорено од двете страни и е ратификувано, ги обврзува и денешниот грчки политики поредок и политичкиот поредок на Северна Македонија“,
вели тој.
Говорејќи во врска со можноста Атина да стави вето на евроинтегративниот процес на земјава, шефот на грчката дипломатија рече дека ветото е институционално право на земјите членки на Европската Унија. Во тој контекст, тој повтори дека почитувањето на Договорот од Преспа е предуслов за напредок на С Македонија кон Унијата.
„За Северна Македонија, доследното спроведување на Договорот од Преспа, претставува јасен предуслов за нејзиниот интегративен тек, односно претставува предуслов за напредок на интегративните процеси“,
кажа Герапетритис додавајќи дека Грција одблизу ги следи случувањата во земјава.
Тој во утринското интервју на ЕРТ се осврна и на, како што кажа, брзата реакција на Грција и на Европската Унија по завчерашната инаугуративна седница на која додека претседателот на Собранието Јован Митрески го читаше уставното име Република Северна Македонија, новоизбраната претседателка на државата, Гордана Сиљановска-Давкова, при повторувањето, користеше само Македонија.
Герапетритис информира дека на иницијатива на грчкото МНР веднаш биле известени европските власти и дека постои координирана реакција во правец на усогласување.
Во интервјуто за грчката државна телевизија тој неколкупати повтори дека бараат усогласување со Договорот од Преспа и од другата страна.
За трите меморандуми што сè уште не се ратификувани во грчкиот парламент, посочи дека последните случувања ја оправдуваат нивната политика и додаде дека ратификацијата зависи од целосното усогласување со договореното.
„Ние ќе ги донесеме во парламентот кога ќе постои клучно политичко време, односно кога ќе биде убедена грчката страна дека постои целосно усогласување. Сите знаеме дека постојат точки за кои соседната земја се нема усогласено“,
вели шефот на грчката дипломатија.
По многубројните меѓународни реакции, вчера се огласија од кабинетот на Силјновска-Давкова, од каде што рекоа дека претседателката ќе се придржува до официјалната примена на уставното име, но дека има право да користи Македонија во јавни настапи како чин на лично право на самоопределување и самоидентификација почитувајќи ги основните човекови права и слободи и согласно европските вредности и начела.
„Претседателката Гордана Силјановска-Давкова ќе се придржува до официјалната примена на уставното име. Согласно Уставот, како што беше подготвена од службите на Собранието, свечената заклетва беше потпишана со користење на уставното име“,
се посочува во писмениот став на кабинетот на претседателката Гордана Силјановска-Давкова.
Потпретседателот на ВМРО-ДПМНЕ, Владо Мисајловски, во интервју за „360 степени“ емитувано вчера вечер (13.05.2024 г.) на МРТ 1 рече дека немаат дилеми како партија и како општество оти „имаме еден пат – кон НАТО и ЕУ“, но нема да до променат тоа што го зборувале и претходно во врска со употребата на Република Македонија и терминот „северна“.
Според него, новата претседателка на државата Гордана Силјановска-Давкова не го прекршила Уставот со неупотребата на уставното име на државата при положувањето заклетва во Собранието. Мисајловски додава дека пратениците, министрите од ВМРО-ДПМНЕ, градоначалниците и новата претседателка Силјановска-Давкова ќе го користат терминот „северна“ само тогаш кога законот налага.
На прашањето што ако тоа значи ново вето од Грција, Мисајловски рече оти не мисли дека би имало ново вето поради ова.
„Баш намерно спомнувам дека и грчките политичари го употребуваат терминот Македонија. Многу пати кога имаат јавни настани, ако ги забележите, постојано велат Македонија и одговорот треба од нив да стигне. Но, никој во нашата земја не може да ни забрани името Македонија да го користиме. Јас во Собрание ова постојано го користам, претседател сум на Комисијата за транспорт, секој ден работам согласно закон“,
рече потпретседателот на ВМРО-ДПМНЕ.