Австрискиот министер за европски и меѓународни прашања Александар Шаленберг, како што пренесоа бугарските медиуми, изјави во Софија дека неговата позиција е многу јасна и дека Австрија би сакала разговорите со Албанија и Северна Македонија да започнат во јуни
Од Скопје очекуваме конкретни акции и гаранции за трајно и неповратно спроведување на Договорот за добрососедство од 2017 година, како и гарантирање на правата на граѓаните на Република Северна Македонија со бугарски идентитет, изјави министерката за надворешни работи на Бугарија Теодора Генчовска која во МНР го прими министерот за европски и меѓународни работи на Австрија, Александар Шаленберг, јави БГНЕС.
Генчовска рече дека двајцата разговарале и за европската перспектива на Западен Балкан.
„На министерот Шаленберг му ја истакнав постојаната поддршка на Бугарија за европскиот пат на земјите од Западен Балкан. Се разбира, напредокот на патот кон членството е секогаш поврзан со принципот на сопствените заслуги. Во последните месеци сите знаете дека Бугарија направи значителни напори за промовирање на позитивна клима во билатералните односи со Република Северна Македонија, вклучително и преку иницирање формати за засилен развој на секторски политики. Ќе продолжиме да работиме на градење вистински добрососедски односи со Република Северна Македонија. Сепак, тие се можни само со заеднички напори. Од Скопје очекуваме конкретни акции и гаранции за трајно и неповратно спроведување на Договорот од 2017 година. како и гарантирање на правата на граѓаните на Република Северна Македонија со бугарска определба“,
изјави таа за медиумите.
Австрискиот министер за европски и меѓународни прашања Александар Шаленберг, како што пренесоа бугарските медиуми, изјави дека неговата позиција е многу јасна и дека Австрија би сакала разговорите со Албанија и Северна Македонија да започнат во јуни.
„Секако, свесни сме дека има многу чувствителни точки и прашања во билатералните односи кои треба да се разјаснат“,
рече Шаленберг пренесе БГНЕС.
И бугарскиот претседател Румен Радев денеска ги коментираше односите со С Македонија, при што призна дека од лани врз Бугарија се врши притисок за кревање на ветото и изрази надеж дека владата ќе опстои на бугарските интереси.
Премиерот Кирил Петков од денеска е во работна посета на САД, но нема информации дали на тамошните средби ќе стане збор за бугарско-македонскиот спор.
САД преку сите своите претставници постојано укажува на потребата од што поскоро надминување на разликите меѓу двете земји и со тоа кревање на рампата за отворање на пристапните преговори со Европската Унија.