Министерот Венко Филипче уверува дека тестовите што се прават во земјава се релевантни. Тие што се прават во Институтот за јавно здравје (ИЈЗ) се одобрени од Светската здравствена организација (СЗО), а тие во приватните лаборатории во земјава се исто така верификувани од стручната комисија на здравствените власти.
Ваквите појаснувања тој ги даде на денешната прес-конференција одговарајќи на прашањата што се покренаа откако вчера градоначалникот на Куманово, Максим Димитриевски, објави дека направил два теста во приватни лаборатории и дека бил негативен, па побара и да се испита ситуацијата за да може да ја прекине самоизолацијата и да се врати на работа.
Негативизацијата на вирусот кај кумановскиот градоначалник, министерот ја објаснува со временскиот период помеѓу тестовите, како и моментот на зараза. Но, и покрај тоа што последните негативни резултати на Димитриевски се негативни, Филипче порачува дека изолацијата мора да се почитува.
„Има само претпоставки после колку време од тестирањето може пациент да се негативизира, имајќи предвид дека не се знае претходно колку тој бил носител на вирусот. Во конкретниот случај, знаеме дека разликата помеѓу двата теста биле негде 17-18 дена, со третиот тест уште дополнителни 10 дена, што е сосема доволен период еден пациент да се негативизира. Но, мерките се даваат за да се почитуваат и тоа е суштината заради тоа што зад секоја мерка има медицинска издржаност зашто тоа треба да биде така, односно инкубацискиот период да трае 14 дена“,
рече Филипче, порачувајќи дека апсолутно секој треба да се придржува до мерките.
Тој зборуваше и за увидот во Куманово на Државниот санитарен и здравствен инспекторат во врска со состанокот во тој град на кој присуствуваа и премиерот Оливер Спасовски, вицепремиерот Бујар Османи, министерот Арбер Адеми и самиот Филипче, без да знаат дека Димитриевски претходно се тестирал. За овие случувања, посочи Филипче, извештајот од увидот е предаден и во МВР и во него се констатирани пропусти.
Но, кај кого е констатиран пропуст или одговорност, тој не сакаше да коментира без претходно да се консултира со МВР дали може да се изнесе нешто во јавност без да се загрози предметот.
*поврзана вест По излегувањето од карантин, во Дебар почнува скринингот за имунитетот на населението
*поврзана вест Филипче: Маските треба да се носат поради асимптоматските лица