Од Асоцијацијата во објавата на Фејсбук велат дека не постои поголемо кршење на човековите права од тоа да се дозволи да умираат луѓе од болести за кои има лек
Асоцијацијата за цистична фиброза вечерва преку својот фејсбук-профил најави дека нејзини членови утре во 14 часот ќе излезат пред зградата на Владата од каде што ќе се збогуваат со Благојче Илијевски кој почина чекајќи го лекот „трикафта“.
Од Асоцијацијата во објавата велат дека не постои поголемо кршење на човековите права од тоа да се дозволи да умираат луѓе од болести за кои има лек.
„Поради ова, Асоцијацијата за цистична фиброза утре во 14 часот пред Владата ќе се збогува со еден од своите најактивни членови Благојче Илијевски, како жртва на системот и кој поради инертноста на системот од надлежните институции и поради тромите бирократски процедури, почина прерано, чекајќи го лекот `трикафта`. Со едноминутно молчење, свеќи и цвеќе, АЦФ и официјално ќе се збогува со својот соборец, во исто време кога во Битола ќе бидат погребани неговите посмртни останки“,
се наведува во објавата на АЦФ.
Најтешко болниот пациент со цистична фиброза во земјава, Благојче Илијевски, денеска ја изгуби битката со болеста.
Тој беше дел од осумте критични пациенти за кои се бараше итна набавка на лекот. Со кислородна боца тој побара поддршка и од претседателот на државата Стево Пендаровски. Но, и покрај сите напори, не дочека да добие терапија со лекот „трикафта“.
Министерот за здравство Беким Сали, прашан денеска дали пациентите со цистична фиброза ќе чекаат нов министер за здравство, имајќи ги предвид информациите што протекоа во јавноста дека со влезот на Алијанса за Албанците во Владата овој ресор ќе ѝ припадне на оваа партија, рече дека биле детектирани членовите на трите закони чија измена е потреба за да може да се набави лекот и оти се надева дека тоа набрзо ќе биде направено во Собранието.
Тој нагласи дека не би можел да даде временска рамка затоа што набавката на лекот не е во целосна надлежност на Министерството за здравство, туку се работи за повеќе институции.
Инаку, членови на Асоцијацијата за цистична фиброза во саботата протестираа пред Владата барајќи државата веднаш да обезбеди средства за воведување модулаторна терапија по принципот како во сите европски и балкански држави, со соодветен план и стратегија за опфаќање на целата популација која е заболена од оваа ретка болест.
Министрите за здравство и за финансии, Беким Сали и Фатмир Бесими, претходно информираа дека терапијата е првично за осум пациенти во потешка состојба, а стремежите се набавка на лек за 30 пациенти во текот на оваа година.