Министерот за здравство Беким Сали кажа дека се надева оти во најскоро време со сите потребни измени на Законот за јавни набавки и други закони поврзани со набавка на лекови, но со обезбедување финансиски средства, ќе се обезбеди терапија и за другите пациенти со цистична фиброза
И покрај очекувањата на министерот за здравство Беким Сали дека денеска ќе се донесе одлука за обезбедување на средства за лекот „трикафта“ за 30 пациенти со цистична фиброза, сепак, засега терапијата ќе ја добијат само осум пациенти што се во потешка состојба. Другите пациенти со оваа дијагноза, пак, не се знае кога ќе го добијат лекот што им е потребен, но стремежите на надлежните се дека тој ќе биде набавен во текот на оваа година.
Ваквата најава следува по денешниот состанок што министерот за здравство го одржал со министерот за финансии Фатмир Бесими и со претставници од Фондот за здравствено осигурување со цел обезбедување средства за набавка на лекот за овие пациенти.
По средбата, министерот Сали кажа дека се надева оти во најскоро време со сите потребни измени на Законот за јавни набавки и други закони поврзани со набавка на лекови, но со обезбедување финансиски средства, ќе се обезбеди терапија и за другите пациенти со цистична фиброза.
Нагласи и дека ќе иницира законски измени во текот на следната недела и изрази надеж дека тие ќе бидат поддржани од пратениците во Собранието.
„Во делот на цената сè уште нема конкретна финална цена. Имаме првични информации за цената на еден третман за еден пациент на годишно ниво, меѓутоа останува финалната цена да ја добиеме од производителот“,
изјави Сали.
Министерот за финансии Фатмир Бесими, пак, рече дека ќе се најде решение за набавка на овој лек директно од производителот бидејќи е скап.