После подолг период во земјава бројот на активни ковид-случаи падна под 3 000, со што во моментов има 2 950 активни случаи. Последен пат под 3 000 активни случаи се регистрирани на 23 јуни оваа година.
Поголемиот број на оздравени лица во споредба со новозаболените придонесува за намалување на бројот на активни случаи во континуитет во последниот период, а денеска беа регистрирани 386 оздравени во земјава.
„Денес се регистрира и рекорден број на направени тестови на дневно ниво – 2 172, со што вкупната бројка на тестови во нашата земја достигна 123 122. Со зголемување на капацитетите за дијагностика и зголемувањето на бројот на тестови, со пристапот на широко тестирање, целта е рано откривање и следење на што е можно поголем број на случаи, вклучувајќи ги и асимптоматските носители на ковид-19“,
информираат од Министерството за здравство и додаваат дека мерките за заштита даваат резултати.
Од Министерството сметаат дека граѓаните се повеќе се придржуваат до препораките на здравствените власти за спречување на ширење на коронавирусот.
„Уште еднаш апелираме до граѓаните, без исклучок да продолжат да се придржуваат до трите правила – носење заштитна маска, одржување на физичка дистанца и често миење на рацете. Само заеднички можеме да се избориме со ковид-19. Да бидеме одговорни за нашето здравје, но и здравјето на нашите најблиски“,
апелираат од Министерството.