Бесими: Никој не кажал дека ќе се намалат платите

На прашањето дали ќе има намалување на платите во однос на мерката 30 отсто од администрацијата повторно да работи од дома за да се заштеди, министерот рече дека тоа ќе зависи од оценката на секоја институција поединечно

Во ниту еден момент, ниту премиерот, ниту некој друг кажал дека ќе се намалат платите, а тоа не стои ниту во Планот за штедење, но има одредени сектори и колективни договори чии решенија ќе мора да се ревидираат, рече вечерва министерот за финансии Фатмир Бесими во гостувањето на 24 Анализа.

Според него, во 2023 година, поради кризата, може да забават или да запрат вработувањата во јавниот сектор. На институциите им се препорачува со мобилност (префрлување) да ги пополнуваат празните места.

Намалувањето на трошоците во јавниот сектор е многу важно, напомена Бесими, а инфлаторниот притисок мора да се намали.

„Има одредени сектори и колективни договори кои се склучени во одредени околности, а отскокнуваат од другите. Мора да гледаме критички во однос на тоа дали таквите решенија се конзистентни. Има загубари, претпријатија од јавен сектор со плати повисоки од оние на владините функцинери, претседателот на државата, на Собранието, на Уставниот суд, што е дисторизја на системот. Притоа, не се работи за успешни фирми, туку за такви кои очекуваат помош од Буџетот. Тие решенија дефинитивно ќе бидат минато и треба да се ревидираат, а Владата како основач на таквите претпријатија сигурно ќе пристапи со најригорозни мерки“,

истакна Бесими.

На прашањето дали ќе има намалување на платите во однос на мерката 30 отсто од администрацијата повторно да работи од дома за да се заштеди, министерот рече дека тоа ќе зависи од оценката на секоја институција поединечно.

Никој не ги намалува платите на вработените, уверува премиерот и порача институциите да воспостават систем за работа од дома со ротации

„Тоа оставаме на институциите поединечно да го решат. Значи, зависи како ќе оцени институцијата, зависи од обрвските и законските можности“,

напомена министерот за финансии.

Кризата, потенцира Бесими, нема да помине брзо, а ефектите допрва ќе се чувствуваат. Проекциите за македонската економија се од 2,9 до 3,1 раст во наредната година.

Министерот најави дека до крајот на октомври буџетот за 2023 година ќе биде доставен до Владата.

„Се очекува инфлацијата идната година да се ублажи и да биде под просекот од 11,6 проценти колку што е сега, до август. Варијациите се од пет до осум отсто, но калкулациите се уште се различни“,

рече Бесими, нагласувајќи дека земјава ќе ги усогласи проекциите со ММФ, и во однос на растот и во однос на инфлацијата.