Пиротехничарите на ДЗС предупредуваат дека пронајдената неексплодирана граната може да има смртоносен радиус до 150 метри и дека е доволен само еден удар за да дојде до нејзино активирање и експлозија
Артилериска граната од 75 милиметри од Првата светска војна била пронајдена денеска во местото наречено „Ќупот“, југозападно од Гевгелија, во близина на границата со Грција. Според Дирекцијата за заштита и спасување (ДЗС), станува збор за неексплодирано убојно средство, кое веднаш било обезбедено од надлежните служби.
Неексплодираната граната ќе биде безбедно транспортирана и уништена на армискиот полигон „Криволак“.
„Пиротехничарите предупредуваат дека пронајдената неексплодирана граната може да има смртоносен радиус до 150 метри и дека е доволен само еден удар за да дојде до нејзино активирање и експлозија“,
велат од Дирекцијата за заштита и спасување.
Пиротехничарот од ДЗС, Ѓорѓи Стефанов, појаснува дека гранатата е од типот топовски проектили од Првата светска војна и дека најверојатно се работи за испукана, но неексплодирана граната која останала активна. Според него, и при најмал удар може да дојде до моментална експлозија, бидејќи станува збор за исклучително опасно убојно средство, со потенцијално смртоносно дејство во радиус од околу 150 метри.
Директорот на ДЗС, Стојанче Ангелов, апелира до граѓаните, во случај на пронаоѓање на сомнителни предмети што наликуваат на експлозивни средства, да не ги допираат и веднаш да пријават на бројот 112.
Инаку, минатата недела две хемиски гранати со боен отров беа уништени на армискиот полигон „Криволак“.