Исто така, посочи дека е потребно да се дејствува и во усогласување на платите затоа што постојат институции каде што директорите и членовите на управните одбори добиваат несразмерно повисоки плати споредено со обврските што ги имаат, на пример, претседателот на државата или министрите
Работниците и синдикатите да бидат мирни, никој ниту ги намалува платите на вработените ниту нивните права, порача денеска премиерот Димитар Ковачевски коментирајќи ги реакциите од синдикатите по Планот за фискална консолидација што го усвои Владата за намалување на трошоците во буџетските институции.
Синдикатите бурно реагираа откако Владата излезе со план за штедење во јавната администрација, истакнувајќи дека ќе се намалуваат платите во услови на поскапувања, наместо да се седне на маса да се преговара за повисоки плати. Според синдикатите, сите новопотпишани колективни договори со кои се усогласува платата со растот на минималецот може да бидат поништени.
„Замислете, баш таму каде што ние во последните два месеци и во општините и во јавните претпријатија потпишавме 20 колективни договори каде што се утврди усогласување на плата за колку што баравме 2 806 денари. И баш таму треба да се намалат платите за 10 отсто, колку што ние ги зголемивме“,
реагираше Трпе Деаноски, претседател на УПОЗ.
Премиерот Ковачевски денеска соопшти дека е донесена одлука да бидат ревидирани менаџерските договори во голем број институции под ингеренции на Владата, а Комисијата за економски систем е задолжена да ја дефинира новата форма.
Ковачевски порача дека менаџерите на институциите мора да воспостават системи и работа од дома, со ротација од 30 проценти од вработените, со што ќе се намалат трошоците. Исто така, посочи тој, потребно е да се дејствува и во усогласување на платите затоа што постојат институции каде директорите и членовите на управните одбори добиваат несразмерно повисоки плати споредено со обврските што ги имаат, на пример, претседателот на државата или министрите.
„Раководителите на институциите да го прават тоа што го прави и приватниот сектор, да воведат менаџмент систем со ротација на вработени, да имаат поголема контрола во делот на исплатата на прекувремени часови, кои може да се менаџираат и со годишни одмори. Постојат повеќе алатки што менаџерите можат да ги користат“,
рече Ковачевски, одговарајќи на новинарски прашања.