Бајден рече дека добро ја разбира загубата на семјествата, потсетувајќи дека и тој го изгуби неговиот син Бо Бајден, воен ветеран кој почина од рак на мозокот по враќањето од служењето во Ирак
САД нема да бидат заплашени и ќе ја продолжат мисијата за успешно и безбедно евакуирање на луѓето од Авганистан, порача Бајден во неговото обраќање
Американскиот претседател, Џозеф Бајден, се обрати пред јавноста по терористичките напади во Кабул во кои загинаа 12 американски војници, 60 цивили и 140 лица се повредени.
Бајден со емотивен говор рече дека нема да дозволат овој грозоморен чин да биде заборавен, туку организаторите ќе мора да ја платат штетата.
„На оние што го извршија овој напад, како и на секој што сака да ѝ наштети на Америка знајте го ова: Нема да простиме. Нема да заборавиме. Ќе ве ловиме и ќе ве натераме да платите. Ќе ги бранам нашите интереси и нашиот народ“,
рече Бајден на обраќањето во Белата куќа.
Тој рече дека Американците кои денеска ги загубија животите и оние кои се повредени несомнено се херои, бидејќи ги жртвуваа и дадоа своите животи за да спасат други.
Бајден додаде дека сочувствува со сите семејства што ги изгубија саканите во овие напади и се обрати и до семејствата на Авганистанците кои денеска ги изгубија своите блиски вклучувајќи и деца. Бајден рече дека добро ја разбира загубата на семјествата, потсетувајќи дека и тој го изгуби неговиот син Бо Бајден, воен ветеран кој почина од рак на мозокот по враќањето од служењето во Ирак.
„Џил и јас сме бесни и нашите срца се скршени. Верувам исто и вие се чувствувате, и за сите оние авганистански семејства кои ги загубија саканите, вклучувајќи и мали деца, или беа ранети во овој злобен напад. Чувствуваме како и многумина од вас, како да сме вовлечени во црна дупка од која нема излез. Но, ние имаме постојана обврска кон сите вас и семејства на овие херои. Таа обврска не е привремена. Таа трае вечно“,
додаде Бајден.
Тој не ја исклучува можноста да испрати дополнителна војска во Авганистан доколку тоа е потребно за поголема безбедност и успешно завршување на евакуацијата.
„Овие терористи на ИСИС нема да победат. Ќе ги спасиме и Американците и ќе ги извлечеме нашите авганистански сојузници. И нашата мисија ќе продолжи“,
рече Бајден додавајќи дека Америка не може да биде заплашена.