„Предметот е отворен поради потребата од проверка на наводите изнесени во јавноста и медиумите, како и согледување на евентуалните ризици од корупција, судир на интереси, злоупотреба на службена положба или други неправилности во работењето, во рамките на надлежностите на ДКСК“, се вели во соопштението од Антикорупциска, во кое се посочува дека предметот Комисијата го отворила по сопствена иницијатива
Директорката на институтот за јавно здравје (ИЈЗ), Марија Андоновска, вчера на прес-конференција, споделувајќи информации со јавноста за констатираните состојби, изјави дека и на неа одредени работи што ги затекнала кога дошла на функцијата ѝ изгледале, како што кажа, нестварно, а се случувале пред таа да ја преземе позицијата. Таа рече оти очекува дека Јавното обвинителство ќе ги испита утврдените неправилности во работењето на институцијата по објавувањето на извештајот на Државниот завод за ревизија (ДЗР)
Државната комисија за спречување на корупцијата (ДКСК) попладнево соопшти дека денеска отворила предмет во врска со наодите во извештајот на Државниот завод за ревизија за состојбите констатирани во Институтот за јавно здравје (ИЈЗ) за 2024 г., а за кои изминатите два дена информации во јавноста сподели и директорката на ИЈЗ, Марија Андоновска, наведувајќи низа неправилности што биле утврдени по нејзиното доаѓање на функцијата.
Одлуката за отворање предмет антикорупционерите ја донеле денеска на колегиум, постапувајќи по сопствена иницијатива, а во согласност со, како што велат, нивните надлежности утврдени со Законот за спречување на корупцијата и судирот на интереси.
„Предметот е отворен поради потребата од проверка на наводите изнесени во јавноста и медиумите, како и согледување на евентуалните ризици од корупција, судир на интереси, злоупотреба на службена положба или други неправилности во работењето, во рамките на надлежностите на ДКСК“,
се вели во соопштението од Антикорупциска.
Оттаму посочуваат дека ќе ги преземат сите потребни дејствија за прибирање и анализа на релевантна документација и информации од надлежните институции, со цел утврдување на фактичката состојба, а за понатамошниот тек на постапувањето, додаваат од ДКСК, јавноста ќе биде навремено информирана.
Директорката на институтот за јавно здравје (ИЈЗ), Марија Андоновска, вчера на прес-конференција, споделувајќи информации со јавноста за констатираните состојби, изјави дека и на неа одредени работи што ги затекнала кога дошла на функцијата ѝ изгледале, како што кажа, нестварно, а се случувале пред таа да ја преземе позицијата.
Како што наведе, кога дошла на функцијата, нејзиниот тим констатирал дека нема реагенси ниту, пак, евидениција за нив, потоа некои од луѓето ангажирани во институцијата примале плата, а не доаѓале на работа. Нивното наводно присуство го евидентирале нивни колеги кои оделе на работа и за, условно кажано, услугата им биле давани пари.
Андоновска посочи дека се откриени и случаи на вработувања без положен административен испит, неправилни унапредувања и исплата на различни додатоци на плата, а постоеле и неправилности во системот за наградување на вработените, како и набавки на медицинска опрема која не била потребна, додека во исто време недостигала друга неопходна опрема.
Актуелната директорка на ИЈЗ предочи и на несоодветна распределба на работните задачи, при што фармацевтски техничар извршувал работи на медицинска сестра и лаборант, што, како што кажа, можело да влијае врз квалтитетот на здравствените услуги.
Според нејзините наводи, во минатото биле склучувани договори на дело со лица кои веќе биле вработени во Институтот, а деловен простор во сопственост на ИЈЗ ѝ бил издаден на пекарница, што, според директорката, е спротивно на законските прописи.
Дополнително, биле спроведувани јавни набавки кои не биле предвидени во годишниот план за работа на институцијата.
Одговарајќи на новинарско прашање, таа рече дека на одредени вработени им биле исплаќани дополнителни средства во износ од 44 000 до 88 000 денари месечно за активности поврзани со архивска граѓа и други работни задачи, меѓу кои и одржување на дворот.
Сепак, додаде дека голем дел од вработените во Институтот професионално и совесно ги извршувале своите обврски и рече да не се ставаат сите вработени во ист кош.
Според неа, најголемиот дел од утврдените неправилности веќе се надминати, а институцијата работи на воспоставување подобар систем на контрола и отчетност.
Директорката завчера, исто така, на брифинг со новинарите соопшти дека меѓу неправилностите во ИЈЗ е и набавка на мрежен кабел за интернет во должина од 15 километри, вреден околу 15 000 евра, за кој, како што кажа, нема трага каде се наоѓа.
Наведе дека за прослава на 100-годишнината на Институтот биле потрошени околу 50 000 евра за настан во траење од еден час, што, како што додаде, претставува пример за ненаменско трошење на средствата.
„Утврдиме и дека за прослава на 100-годишнината на ИЈЗ за еден час биле потрошени 50 000 евра. Па, за што за еден час можат да се потрошат 50 000 евра? Понатаму, ако законот дозволува за 1 000 евра или за 62 000 денари да набавиш одредени средства што ти се потребни без распишување јавна набавка, тие над милион и нешто имаат потрошено надвор од дозволеното. Замислете, 1 000 евра дозволени, а потрошиле над 20 000 евра“,
рече директорката на ИЈЗ.
Според неа, во Институтот не била направена ревизија од 2017 година, а извештајот на Државниот завод за ревизија за 2024 година, кој веќе е објавен, дава неповолно мислење за финансиското работење и усогласеноста на трансакциите.
ДЗР утврди и неправилности во евиденцијата за прием и потрошувачка на медицински материјал, неспроведени активности од Националната годишна програма, неправилности во ангажманот на лица со договор на дело, како и неевидентирани вакцини во деловните книги во ИЈЗ за 2024 година.
Андоновска вчера рече оти очекува дека Јавното обвинителство ќе ги испита утврдените неправилности во работењето на институцијата по објавувањето на извештајот на Државниот завод за ревизија (ДЗР).