Антикорупциската комисија се изјасни за ненадлежна по пријавата од министерот за внатрешни работи Наќе Чулев против одлуката на Владата за поништување на решението за разрешување и именување во СВР Тетово, соопшти денеска претседателката на ДКСК, Билјана Ивановска, и најави дека пријавата ќе биде доставена до ДИК.
Се работи за решението што Чулев го потпишал на 22 јуни за разрешување на Амир Демети и негово распоредување за дополнителен заменик-началник на СВР Тетово и за именување на Гоце Јанкуловски за началник на СВР Тетово, како 15-то распоредување.
Владата на 23 јуни по вторпат му го поништи решението на Чулев за истото разрешување и именување, по што тој најави кривична пријава бидејќи Антикорупциска ја укинала претходната владина одлука.
Вчера и Управниот суд ја отфрли како беспредметна тужбата на министерот Наќе Чулев за истата владина одлука.
ДКСК денеска се прогласи за ненадлежна за постапување и по предметот во врска со вонреден инспекциски надзор во Службата за општи и заеднички работи поради сознанија за непочитување на законите и вршење притисок врз вработените по повеќе основи, како што се незаконски распоредувања и деградирања на работни места, како и дисциплински постапки и непочитување на правото на вработените за користење годишни одмори. Случајот ќе го проследи до Државниот управен инспекторат.
