Чулев најави кривична: Владата на предлог на ДУИ ми го поништи решението за началник на СВР Тетово
Министерот за внатрешни работи од ВМРО-ДПМНЕ, Наќе Чулев, информира дека Владата повторно му го поништила решението за назначување на началник на СВР Тетово и најавува дека утре ќе поднесе кривична пријава, а и ќе ја запознае меѓународната заедница, за како што вели, упадот и мешањето во работата на МВР.
„Ова место беше едно од 15-те места кои ми следуваат согласно Законот за влада, како министер во техничката влада. Со денешното силеџиско постапување повторно е прекршен Законот за влада, а дополнително денешната одлука предложена од страна на ДУИ, а аминувана од страна на СДСМ е уште еден доказ дека нивната коалиција блеска во полн сјај. ДУИ и СДСМ имаат спротивставени мислења само во јавноста и тоа е само еден блеф. Нивниот меѓусебен однос на владините седници функционира идеално и без никаква пречка“,
вели Чулев.
Тој потсетува дека Владата и претходно му поништила исто решение за началник на СВР Тетово, а Антикорупциската комисија одлучила дека бил направен пропуст и ја укинала одлуката на Владата за поништување на решението за ова началничко место.