Лидерот на ДУИ тврди дека нема несогласувања во партијата и оти сите избрани пратеници во Собранието ќе гласаат за новиот состав на Влада. Според него, Заев се извинил поради тоа што рекол дека „Албанците не вредат ни пет пари“
СДСМ и ДУИ направија многу работи заедно за време на тригодишниот мандат на претходната влада и партнерството треба да продолжи, изјави Али Ахмети.
„Партнерството со СДСМ треба да продолжи. Зедно направивме многу работи. Заев се извини за тоа што во нелегално сниманите разговори кои беа објавени во изборната кампања вели за Албанците дека не вредат пет пари“,
рече Ахмети во гостување на ТВ21.
Тој потенцира дека нема несогласувања во ДУИ, и оти сите избрани пратеници во Собранието ќе гласаат за новиот состав на Влада.
„ДУИ ќе даде зелено светло за новиот состав на Влада. Нема несогласувања во ДУИ. Сите избрани пратеници во Собранието ќе гласаат за новиот состав на Влада“,
рече Ахмети.
Лидерот на ДУИ вечерва зборуваше и за последните релации со СДСМ, како и за превирањата за време на предизборната кампања. Притоа, потенцираше дека Заев не се израдувал на победата на ДУИ, која освои најмногу – 15 мандати во албанскиот политички камп или пет повеќе отколку во претходниот собраниски состав.