Каков и да е внатрепартискиот дил во ДУИ, според изворот на „360 степени“, тој ги обезбедува гласовите на тројцата пратеници бунтовници, меѓу кои и потпретседателот Изет Меџити и поранешниот директор на Центарот за јавно здравје – Скопје, Арбен Зибери
Деловникот за работа на Собранието нормира дека претресот за предлогот на мандатарот трае најмногу два дена. Гласањето е на крајот на дебатата или најдоцна на полноќ на истектот на вториот ден
Надминати се недоразбирањата во ДУИ со што е отворен патот за скорешен избор на новата влада во Собранието. Извор од декларираното мнозинство вели дека Али Ахмети го уверил Зоран Заев дека може да смета на сите 15 гласа од пратеничката група на ДУИ за кандидатите за министри со кои веќе беше запознаена јавноста: Артан Груби за вицепремиер (и министер за политички систем) и Бујар Османи за министер за ндаворешни работи. За другите кандидати немаше внатрепартиски негодувања во ДУИ.
Засега нема официјална потврда на гласините дека Ахмети ја добил согласноста на незадоволниците од разграноците во Чаир и во Сарај со ветување до нив дека по шест месеци ќе се оценува работата на министрите и дека тогаш се можни кадровски промени. Каков и да е внатрепартискиот дил, според изворот на „360 степени“, тој ги обезбедува гласовите на тројцата пратеници бунтовници, меѓу кои и потпретседателот на ДУИ, Изет Меџити, и поранешниот директор на Центарот за јавно здравје – Скопје, Арбен Зибери. Со нив, Заев би можел да смета на 62 гласа во парламентот.
Заев в среда ќе ја предложи владата до Собранието
Ако на мнозинството утре му успее да ја заврши измената во пратеничкиот состав, а поради заминување на министерски позиции треба да се повлечат 7-мина пратеници од СДСМ и еден од ДУИ (плус Флорин Бесими), тогаш мандатарот Заев веќе в среда би можело да ги достави до парламентот предлог-составот и програмата за работа на новата влада.
При вакво сценарио, најавите се дека за предлогот на Заев би се дискутирало за време на викендот (29 и 30 август) веднаш по православниот празник Успение на Пресвета Богородица, кој се одбележува в петок (28 август).
Деловникот предвидува дебата од најмногу два дена
Деловникот за работа на Собранието нормира дека претресот за предлогот на мандатарот трае најмногу два дена. Гласањето е на крајот на дебатата или најдоцна на полноќ на истектот на вториот ден. Под услов претседателот на Собранието да ја закаже седницата за в сабота, гласањето за новата влада би се случило најдоцна в недела на полноќ. Со тоа Северна Македонија би имала нова влада, со старите коалициски партнери, веќе од понеделник, 31 август.
Член 112 (Деловник на Собранието)
(1) По програмата на мандаторот и предлогот за состав на Владата,
Собранието води единствен претрес. Претресот трае најмногу два дена.
(2) Редоследот на пратениците кои ќе учествуваат во претресот го
утврдува претседателот на Собранието на начин кој обезбедува учество во претресот на пратеници од различни политички партии застапени во Собранието.
(3) Гласањето за избор на Владата се врши по предлогот за состав на Владата во целина, со јавно гласање. Гласањето се врши по завршување на претресот, а најдоцна во 24,оо часот.
(4) Владата е избрана ако за неа гласало мнозинството од вкупниот број пратеници.