Внатрепартиската дебата, според лидерот на ДУИ е дел од функционирањето на внатрешната партиска демократија
Претседателот на Демократската унија за интеграција, Али Ахмети, за Телевизија Клан Македонија потврдил дека нема промени во листата со предлози за министерски места и дека експертските тимови на СДСМ и ДУИ денеска го завршиле усогласувањето на предизборните програми на обете партии за спојување во заедничка владина програма, објави телевизијата вечерва.
И покрај шпекулациите за незадоволство во гранките на интегративците во општините Сарај и Чаир, владејачката формација на Демократската унија за интеграција останува онаа што претходниот ден доби зелено светло на партиските органи.
Ахмети, во неформален разговор за оваа телевизија рекол дека дебатите, што во јавноста се квалификуваат како незадоволство во партијата од ограноците од Сарај и Чаир поради предложените партиски кадри за министри, според него се дел од „функционирањето на внатрешната партиска демократија“.
Според него, кандидати за министри на ДУИ остануваат: Фатмир Бесими, Бујар Османи, Артан Груби, Насер Нуредини, Крешник Бектеши и Јетон Шаќири.
„Овој тим ја ужива поддршка од целата наша парламентарна група“,
рекол Ахмети за ТВ Клан.
Телевизијата, исто така, објави дека дознава оти експертските тимови од коалицијата „Можеме“ предводени од СДСМ и од редовите на ДУИ практично ја усогласиле владината програма.
Веќе подолго време во јавноста се говори за несогласувања во ДУИ околу предложените кандидати за министри, а тие се најизразени кај партиските ограноци на ДУИ во Чаир и во Сарај. Со тоа во прашање се гласовите за поддршка на новата Влада на Изет Меџити и уште една пратеничка од Чаир, како и гласот на Арбен Зибери од огранокот во Сарај.
Со договорот за коалицирање меѓу лидерите на СДСМ, ДУИ и ДПА, Зоран Заев, Али Ахмети и Мендух Тачи, парламентарното мнозинство треба да брои 62 пратеници, а за избор на владиниот состав се потребни најмалку 61 глас во Собранието.
Мандатарот Зоран Заев најави денеска дека прво треба да се утврди бројот на потпретседатели во новиот парламент и евентуално да се изберат новите носители на овие функции, пред да се оди на избор на владата.
Последен рок за доставување на новиот министерски список во Собранието е 2 септември, но брзото закажување на втората седница на Собранието е своевидно навестување дека Заев можеби нема да чека дотогаш, туку ќе го достави предлог – составот на Владата во наредните денови.
Потоа, спикерот Талат Џафери треба да закаже нова седни а во рок од 15 дена.
За утре во 11 часот е закажана седница на Собранието на која ќе се утврдува бројот на потпретседатели на парламентот во овој состав.
Според предлог-одлуката која единствена точка на дневниот ред на утрешната седница, и во овој собраниски состав ќе може да има најмногу пет потпретседатели.
На почетокот на седницата, се очекува да биде констатирана оставката на Флорин Бесими (брат на кандидатот за министер од ДУИ, Фатмир Бесими) и евентуално оставките што би ги поднеле мандатарот за состав на владата Зоран Заев и другите новоизбрани пратеници од мнозинството кои се номинирани за министри.